ऊर्जा खबर
काठमाडौं । म्याग्दीमा निर्माणाधीन १४ मेगावाटको घारखोला जलविद्युत आयोजनाको मुख्य सुरुङ छेडिएको छ । म्याग्दी हाइड्रो पावर कम्पनीले घारखोलामा निर्माण गरिरहेको आयोजनाको ३ हजार ५ मिटर लामो मुख्य सुरुङ खनेर सकिएको हो ।
२ ठाउँबाट खन्न सुरु गरिएको मुख्य सुरुङ साढे २ वर्षमा छेडिएको आयोजना प्रमुख बिनोद देवकोटाले बताए । ‘एकतर्फबाट १६ सय मिटर र अर्कोतर्फबाट १४ सय ५ मिटर सुरुङ खनेर सकिएको छ,’ उनले ऊर्जा खबरसँग भने, ‘अब लाइनिङको काम सुरु गर्दैछौं ।’
उनले अहिलेसम्म सिभिलतर्फ आयोजनाको ७३ प्रतिशत निर्माण सकिएको देवकोटाले जानकारी दिए । आयोजनाको बाँध क्षेत्रका सबै संरचनाको निर्माण सम्पन्न भइसकेको छ । विद्युतगृहमा धमाधम काम भइरहेको छ ।
इलेक्ट्रोमेकानिकल उपकरण आयात भइरहेकाले अब चाँडै जडानको काम सुरु गरिने पनि उनले बताए । पेनस्टक पाइप जडानको काम आधा सकिएको छ । निर्माण अन्तिम चरणमा पुगेको आयोजनाबाट २०७९ जेठदेखि विद्युत उत्पादन गर्ने तालिका छ ।
आयोजनाबाट गत असारदेखि नै विद्युत उत्पादन गर्ने तालिका थियो । कोरोना (कोभिड–१९) महामारीको असर, भौगोलिक विकटता, बाढी र पहिरोको जोखिमलगायत कारणले उत्पादन तालिका प्रभावित हुन पुगेको कम्पनीले जनाएको छ ।
आयोजना सम्पन्न गर्न २ अर्ब ४२ करोड रुपैया लागत अनुमान गरिएको छ । आयोजनामा ऐनएमबी बैंकको अगुवाईमा ७० प्रतिशत ऋण लगानी छ । बाँकी ३० प्रतिशत स्वपुँजी लगानी रहेको छ ।
आयोजनाबाट उत्पादीत विद्युत ७ किलोमिटर दुरीमा रहेको नेपाल विद्युत प्राधिकरणको दाना सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गरीरहेको छ ।
