ऊर्जा खबर
काठमाडौं । नेपाल धितोपत्र बोर्डले ५२ लाख ५० हजार कित्ता साधारण सेयर निष्कासन गर्न २ जलविद्युत कम्पनीलाई अनुमति दिएको छ । बोर्डले निर्माणाधीन र निर्माण सम्पन्न जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन अनुमति दिएको हो ।
सय रुपैयाँ अंकित ५२ करोड ५० लाख रुपैयाँ बराबरको साधारण सेयर निष्कासन गरी बाँडफाँड गर्न जलविद्युत कम्पनीलाई अनुमति दिइएको बोर्डले जनाएको छ । बोर्डका अनुसार अनुमति पाउनेमा न्यादी हाइड्रोपावर र बुद्धभुमी नेपाल हाइड्रोपावर कम्पनी रहेको छन् ।
अनुमति पाउने मध्ये बुटवल पावर कम्पनी (बिपिसी) को सहायक न्यादी हाइड्रोपावरले ४० लाख ५० हजार कित्ता साधारण सेयर निष्कासन गर्नेछ । कम्पनीले सेयर निष्कासन गरी बाँडफाँड गर्न गत सोमबार (११ गते) अनुमति पाएको हो ।
कम्पनीले लमजुङमा निर्माणाधीन ३० मेगावाटको न्यादी खोला जलविद्युत आयोजनाको स्थानीय र सर्वसाधारणका लागि छुट्याएको सेयर निष्कासन अनुमति पाएको हो । यो कम्पनीले सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक चयन गरेको छ । कम्पनीले निर्माण गरिरहेको आयोजना अन्तिम चरणमा पुगिसकेको छ ।
यस्तै, बुद्धभुमी नेपालले पनि १२ करोड रुपैयाँ बराबरको १२ लाख कित्ता साधारण सेयर निष्कासन गर्न बिहीबार (१४ गते) अनुमति पाएको हो । कम्पनीले नुवाकोटमा सञ्चालित ५ मेगावाटको तादी खोला जलविद्युत केन्द्रको स्थानीय र सर्वसाधारणका लागि छुट्याएको सेयर निष्कासन गर्न अनुमति पाएको हो । कम्पनीले सेयर निष्कासन गरी बाँडफाँड गर्न सिभिल क्यापिटल मार्केट लिमिटेडलाई बिक्री प्रबन्धक चयन गरेको छ ।
.jpg)
