ऊर्जा खबर
काठमाडौं । लमजुङस्थित २५ मेगावाटको माथिल्लो दोर्दी ‘ए’ जलविद्युत आयोजनाको संरचनामा अर्को सातादेखि पानी भर्न सुरु गरिने भएको छ । नेपाल विद्युत प्राधिकरणले १३२ केभी कीर्तिपुर–उदिपुर प्रसारण लाइन पूरा गरेकाले आयोजनाबाट परीक्षण उत्पादन सुरु गर्न संरचनामा पानी भर्न लागिएको हो ।
आयोजनाको ‘ड्राइ टेष्ट’ भइसकेकाले अर्को सातादेखि ‘वेट टेष्ट’ सुरु गर्न संरचनामा पानी भर्ने तयारी भइरहेको प्रवद्र्धक रिबर्टी हाइड्रो इनर्जी कम्पनीका प्रबन्ध निर्देशक आत्माराम घिमिरेले बताए । ‘आयोजनाको संरचना र उपकरणको ड्राइ टेष्ट भइसकेको छ,’ उनले ऊर्जा खबरसँग भने, ‘अब बाँध, सुरुङ र पाइप लाइनमा पानी हालेर कुनै समस्या भए/नभएको हेर्छौंं ।’
उनले आयोजनाको परीक्षण गर्न इलेक्ट्रोमेकानिकल उपकरणको आयात तथा जडानकर्ता कम्पनीका प्राविधिकलाई लमजुङ बोलाइसकेको बताए । उनीहरूलाई आयोजना स्थलसम्म पुर्याउन कोरोना (कोभिड–१९) परीक्षण गर्नुपर्ने हुँदा संरचनामा पानी भर्ने कामको थालनी गर्न एक साताको समय लाग्ने देखिएको उनले जानकारी दिए ।
सुरुमा संरचनामा पानी भरेर आन्तरिक परीक्षण गर्ने र यो सफल भएपछि विद्युत प्राधिकरणको प्राविधिक टोलीले परीक्षण गरेपछि ग्रिडमा जोडिने कम्पनीले जनाएको छ । विद्युत प्रवाह हुने कीर्तिपुर–उदिपुर प्रसारण लाइन पूरा भइसके पनि २२० केभी उदिपुर–मार्कीचोक प्रसारण लाइन अझै पूरा भइसकेको छैन । प्रसारण लाइनको २ वटा टावर ठड्याउन तथा तार तान्न बाँकी छ । प्राधिकरणले टावर ठड्याउने र तार तान्ने काम जेठभित्र सम्पन्न गरेर सञ्चालनमा ल्याउने बताएको छ ।
विद्युत प्राधिकरणसँग प्रसारण सम्झौता ९कनेक्सन एग्रिमेन्ट० हुँदा आयोजनाको विद्युत उदिपुर सबस्टेसनमा जोड्ने भनिएको थियो । उदिपुर सबस्टेसन बनिनसकेकाले अब यो आयोजनाको विद्युत किर्तीपुर सबस्टेसनमार्फत २२० केभी उदिपुर–मार्कीचोक–भरतपुर प्रसारण लाइन हुँदै मध्यमर्स्याङ्दी जलविद्युत केन्द्रको स्वीचयार्डमा लगेर जोडिने भएको छ ।
दोर्दी कोरिडोरमा निर्माणाधीन आयोजनाको विद्युत खेर जान नदिने उद्देश्यले उदिपुर–मार्कीचोक–भरतपुर खण्डको ६ किलोमिटर प्रसारण लाइन निर्माण भइरहेको छ । २२० केभीको प्रसारण लाइनलाई १३२ केभीमा चार्ज गरेर तत्कालका दोर्दी कोरिडोरको विद्युत मध्यमर्स्याङ्दीको स्वीचयार्डमा पुर्याइने छ । उदिपुर सबस्टेसन सम्पन्न भइसकेपछि फेरि यही सबस्टेसनमा जोडिनेछ ।
प्राधिकरणले विद्युत उत्पादनका लागि असार मसान्तसम्मको समय दिएको घिमिरेले जानकारी दिए । आयोजनाबाट २०७६ चैतदेखि विद्युत उत्पादन सुरु गर्ने तालिका थियो । तर, प्रसारण लाइनको समस्याकै कारण आयोजनाको उत्पादन १५ महिना ढिलो गरी सुरु हुने तयारीमा छ ।
आयोजना सम्पन्न गर्न ४ अर्ब ६४ करोड ६१ लाख रुपैयाँ खर्च भएको छ । आयोजना सञ्चालनमा आएपछि वार्षिक १३ करोड ६७ लाख ८४ हजार ८ सय ६९ युनिट विद्युत उत्पादन हुनेछ । विद्युत उत्पादन सुरु भएको पहिलो वर्षमा करिब ८० करोड रुपैयाँ आम्दानी हुने प्रक्षेपण गरिएको छ ।
दोर्दी कोरिडोरमा माथिल्लो दोर्दी ‘ए’सँगै ५४ मेगावाटको सुपर दोर्दी ‘ख’, १२ मेगावाटको दोर्दी–१, २७ मेगावाटको दोर्दी खोला लगायत आयोजना निर्माणाधीन छन् ।
