ऊर्जा खबर
काठमाडौं । निर्माणाधीन ३८.४६ मेगावाटको माथिल्लो कालंगागाड जलविद्युत आयोजनाको मुख्य सुरुङ पूरा भएको छ । सानीगाड हाइड्रो कम्पनीले सुदुरपश्चिम प्रदेशको बझाङस्थित कालंगा बेसिनमा निर्माण गरिरहेको आयोजनाको ७ हजार ८ सय ५ मिटर लामो सुरुङ बुधबार खनेर सकिएको हो ।
सफलतापूर्वक मुख्य सुरुङ छेडिएको आयोजना संयोजक सुनिल रेग्मीले बताए । ‘खनेर सकिएको सुरुङ ढलानको काम भोलिदेखि नै सुरु हुन्छ,’ उनले ऊर्जा खबर सँग भने, ‘सुरुङ ढलानको काम साढे ४ महिनाभित्र सम्पन्न हुन्छ ।’
आयोजनाको ८५ प्रतिशत बढी निर्माण पूरा भइसकेको छ । बाँध क्षेत्रको संरचनाको निर्माण सकिएको छ । आयोजनाको १ हजार १ सय ५० मिटर पेनस्टक पाइपमध्ये ६ सय ५० मिटर पाइप राख्ने काम पूरा भएको छ । बाँकी ५ सय मिटर असारभित्र पुरा हुन्छ ।
विद्युतगृहको सिभिल संरचनाको काम पूरा भई उपकरण जडानको काम धमाधम भइरहेको पनि उनले बताए । उपकरण जडानको काम पनि साउनभित्र पूरा गरिसक्ने लक्ष्य छ ।
संरचना निर्माणको काम पूरा गरेर आयोजनाबाट २०७८ भदौ तेस्रो सातादेखि विद्युत उत्पादन गर्ने लक्ष्य छ । आयोजनाबाट २०७७ असारदेखि उत्पादन सुरु गर्ने तालिका भए पनि भौगोलिक विकटता तथा कमजोर भौगोलिक अवस्थाका कारण सुरुङमा देखिएको समस्याले सम्भव नभएको कम्पनीले जनाएको छ । आयोजनाको सबैभन्दा जटिल र कठिन सुरुङ खन्ने काम सकिएकाले अब निर्माणले गति लिने जनाइएको छ ।
आयोजनाले उत्पादन गर्ने विद्युत दार्चुलास्थित १३२/३३ केभी बलाँच सबस्टेसनमा जोडिनेछ । आयोजना पूरा गर्न ६ अर्ब ९४ करोड रुपैयाँ लागत अनुमान गरिएको छ । आयोजनामा माछापुच्छ्रे बैंकको अगुवाइमा ८ बैंकले ऋण लगानी गरेका छन् ।
कालंगा बेसिनमा माथिल्लो कालंगागाडसहित १५.३३ मेगावाटको कालंगागाड र १०.७ मेगावाटको सानीगाड आयोजना निर्माणाधीन छन् । ३ वटै आयोजना एउटै समूहले निर्माण गरिरहेको हो ।
.jpg)
