दैलेखको भैरवी गाउँपालिकाका २०० घरमा पहिलो पटक पुग्यो राष्ट्रिय ग्रिडको बिजुली 

काठमाडौँ । दैलेखको भैरवी गाउँपालिका–५ बडाचौर–खालि–डोग्रा क्षेत्रमा पहिलो पटक राष्ट्रिय प्रसारण लाइनको बिजुली पुगेको छ । नेपाल विद्युत् प्राधिकरण, दैलेख वितरण केन्द्रले पुरानो एचटिएलटी लाइन मर्मत–सुधार एवम् २ थान ट्रान्सफर्मर चार्ज गरी उक्त क्षेत्रका बरिब २०० घरधुरीमा विद्युत् पुर्‍याएको हो । 

बिजुली पुगेको त्यस क्षेत्रमा पालिकाले प्रत्येक घरधुरीलाई निःशुल्क विद्युत् मिटर समेत प्रदान गरेको छ । सोही मिटरबाट प्राधिकरणले पुर्‍याएको बिजुली बालेर गाउँ नै झिलिमिली पार्न पाएपछि स्थानीयबासी निकै खुसी देखिएका छन् । ‘अब इन्टरनेट, मोबाइल, कम्युटर, टिभी जस्ता उपकरण चलाउन र बत्ती बाल्न पनि सहज रूपमा बिजुली पाइने भयो,’ एक स्थानीयले भने, ‘सोलारको मधुरो बत्ती बाल्नु पर्ने बाध्यता अब हट्यो ।’

गाउँपालिका उपाध्यक्षसहित जनप्रतिनिधिहरूको निरन्तर ताकेता एवम कार्यालयको अग्रसरताले विभिन्न बाधाहरू चिर्दै विद्युत् सेवा सुचारु गर्न सफल भएको हो । साथै स्थानीय जनप्रतिनिधिले विद्युतीकरण हुन बाँकी बस्तीहरू समेट्न आग्रह पनि गरेका छन् ।