ऊर्जा खबर
काठमाडौँ । दुई दिनको निरन्तरको वर्षाका कारण मुलुकभर आएको बाढी तथा पहिरोले ऊर्जा क्षेत्रमा करिब साढे ४ अर्ब ३५ करोड बराबरको क्षति भएको छ । आइतबार सिंहदरबारस्थित ऊर्जा, जलस्रोत तथा सिँचाइ मन्त्रालयमा पत्रकार सम्मेलन गर्दै मन्त्रालयले यस्तो जानकारी दिएको हो । मन्त्रालयले ऊर्जातर्फ २ अर्ब ४५ करोड,सिँचाइतर्फ १ अर्ब ३५ करोड र नदी नियन्त्रणतर्फ करिब १ अर्ब १६ करोड २० लाख रुपैयाँ गरी समग्रमा करिब ४ अर्ब ३५ करोड रुपैयाँ बराबरको क्षति भएको जनाएको छ ।
मन्त्रालयले यो क्षति अनुमान मात्रै रहेको भन्दै अझै बढ्नसक्ने बताएको छ । पत्रकार सम्मेलनमा बोल्दै ऊर्जा, जलस्रोत तथा सिँचाइमन्त्री दीपक खड्काले बाढी र पहिरोका कारण १ हजार १ सय मेगावाटका जलविद्युत् आयोजनाको उत्पादन बन्द भएको पनि बताए । उनले जलविद्युत् र प्रशारणलाइनतर्फ २ अर्ब ४५ करोड बराबरको क्षति भएको बताए ।
उनले सिँचाईतर्फ १ अर्ब ३५ करोड बराबरको क्षति भएको उल्लेख गरे । मन्त्री खड्काले बाढी र पहिरोले निजी क्षेत्रका २६ वटा भन्दा बढी जलविद्युत आयोजनामा क्षति पुगेको पनि बताए । ऊर्जामन्त्री खड्काले दुई दिनसम्म लगातार परेको अविरल वर्षाका कारण तामाकोशी जलविद्युत् आयोजनामा काम गर्ने विद्युत प्राधिकरणका दुई जना कर्मचारी र सुरक्षामा खटिएका नेपाल आर्मीका दुई जना गरी चार जना बेपत्ता भएको बताए ।
उनले निजी क्षेत्र र सरकारको लगानीमा निर्माण भएका जलविद्युत, ट्रान्समिसन लाइनमा ठूलो क्षति भएको जानकारी दिए । उनले मौसम विभागले गरेको पूर्वअनुमान गरी दिएको सूचनाको कारण क्षति कम भएको बताए ।
उनले भने, ‘दुई दिनसम्म लगातार परेको अविरल वर्षाका कारण तामाकोशी जलविद्युत आयोजनामा काम गर्ने विद्युत प्राधिकरणका दुई जना कर्मचारी र सुरक्षामा खटिएका नेपाल आर्मीका दुई जना बेपत्ता भएका छन् । ऊर्जा मन्त्रालय अन्तर्गत भएको क्षतिको पनि विवरण आएको छ । बाढीको कारण ११ सय विद्युत अवरुद्ध भएको छ । पूर्णरुपमा क्षति भने होइन । निजी क्षेत्र र सरकारको लगानीमा निर्माण भएका जलविद्युत,ट्रान्समिसन लाइनलाई जोड्दा करिब साढे २ अर्ब ४५ करोड बराबरको क्षति भएको हो । यो अनुमान मात्रै हो । बढ्न पनि सक्छ । सिँचाइ तर्फका आयोजनाहरूमा पनि १ अर्ब ३५ करोड भन्दा बढी क्षति भएको छ । मौसम विभागले गरेको पूर्वअनुमानले पनि कम क्षति भएको हो । लगातार वर्षाले क्षति हुने जानकारी गराउँदा गराउँदै पनि केही क्षति भएको छ । गत वर्ष पूर्वमा भएको बाढीमा मात्रै ऊर्जा क्षेत्रमा १० अर्बको थियो । जनधनको पनि ठूलो क्षति भएको थियो । सरकारले निर्माणाधीन आयोजनामा राती नबस्न र यातायात बन्द गर्ने जानकारी दिएकाले कम क्षति भएको छ ।’
उनले गत वर्ष पूर्वमा भएको बाढीमा मात्रै ऊर्जा क्षेत्रमा १० अर्ब रुपैयाँ र ठूलो जनधनको पनि क्षति भएको बताए । मन्त्री खड्काले जलविद्युत आयोजनाहरू पूनःनिर्माणको कामलाई प्राथमिकता राखेर काम गर्ने प्रतिबद्धता जनाए । सरकारले विभिन्न क्षेत्रमा नदी कटान,डुबान तथा बाढीले नदी नियन्त्रणतर्फ करिब १ अर्ब १६ करोड २० लाख रुपैयाँ बराबरको क्षति भएको अनुमान गरेको छ ।
