ऊर्जा खबर
काठमाडौं । १८० मेगावाट क्षमताको कालीगण्डकी गर्ज जलविद्युत आयोजनाको विद्युत खरिद सम्झौता (पीपीए) दर निर्धारण प्रक्रिया अगाडि बढेको छ । कालीगण्डकी गर्ज हाइड्रो पावर प्रा.लि ले निर्माण अघि बढाउन लागेको आयोजनाको विद्युत खरिद बिक्री दर निर्धारण प्रक्रिया अगाडि बढेको हो ।
दररेट निर्धारण गर्न विद्युत नियमन आयोगले भदौ ३१ गते शुक्रबार सार्वजानिक सुनुवाई गर्न लागेको छ। पीपीए दरका बारेमा सरोकारवालासँग सुझाव लिने प्रक्रिया अगाडि बढाएको हो ।
नेपाल विद्युत प्राधिकरणले परियोजनाबाट उत्पादन हुने बिजुलीको दररेट प्रस्ताव गरिसकेको छ । वर्षायाममा प्रतियुनिट ४.८ रुपैयाँ र सुक्खा याममा १०.५५ रुपैयाँ र नन–पिकिङमा ८.४ रुपैयाँ प्रस्ताव गरिएको छ । पिकिङको अवधि ६ घण्टा हुनेछ ।
पीपीए दर वार्षिक ३ प्रतिशतका दरले ८ पटकसम्म साधारण मूल्यवृद्धि गर्ने प्रस्ताव गरिएको छ । आयोजना गण्डकी प्रदेशको म्याग्दी र मुस्ताङ जिल्लाको थासाङ र अन्नपूर्ण गाउँपालिकामा अवस्थित हुनेछ ।
आयोजनाबाट प्रतिघन्टा १ अर्ब ५ करोड ५५ लाख ५२ हजार ३ सय १३ किलोवाट विद्युत उत्पादन हुनेछ । वर्षायाममा उत्पादन हुने विद्युतीय ऊर्जा प्रतिघन्टा ७१ करोड ७३ लाख ३८ हजार ८ सय ६७ किलोवाट विद्युत उत्पादन हुने कम्पनीले जनाएको छ । आयोजनाको सम्पन्न गर्न ३९ अर्ब ७४ करोड रुपैयाँ लागत अनुमान गरिएको छ ।
