ऊर्जा खबर
काठमाडौं । देशभर एक वर्षमा ३०६१ बायोग्यास प्लान्ट जडान भएको छ । सरकारले आइतबार (जेठ १४ गते) सार्वजनिक गरेको आर्थिक सर्वेक्षण २०७९/८० अनुसार चालु आर्थिक वर्ष (आव) को फागुनसम्ममा उक्त प्लान्ट जडान भएका हुन् ।
आव २०७८/७९ मा बायोग्याँसतर्फ ६३७४ प्लान्ट जडान भएकोमा चालु आवकाे फागुनसम्ममा ३०६१ प्लान्ट जडान भएको देखाइएकाे छ । ग्रामीण क्षेत्रमा खाना पकाउन उत्तम प्रविधि साबित भएकोले यसको लोकप्रियता बढ्दै गएको छ।
चालु आवकाे फागुनसम्मा ३५८५ वटा सौर्य घरेलु विद्युत प्रणालीमा जडान भएको छ । आव २०७८/७९ मा १२ हजार ७६ सौर्य घरेलु विद्युत प्रणाली र १३ हजार ३ सय ३ सुधारिएको चुलो जडान भएको थियो ।
आव २०७८/७९ सम्ममा वैकल्पिक ऊर्जा प्रवर्द्धन केन्द्र अन्तर्गत लघु तथा साना जलविद्युत आयोजनाबाट उत्पादित विद्युत १७४८ किलोवाट रहेको छ । चालु वर्षको फागुनसम्म ३८२.५ किलोवाट उत्पादन भएको छ । त्यस्तै, चालु आव २०७९/८० मा सौर्य तथा वायु ऊर्जाबाट ८७६ किलोवाट उत्पादन भएको छ ।
२०७९ फागुनसम्म ७.५ प्रतिशत जनसंख्यामा नवीकरणीय ऊर्जा स्रोतबाट विद्युतको पहुँच पुगेको छ । गत वर्ष फागुनसम्मा ६.९ प्रतिशतश रहेको थियो । सर्वेक्षण अनुसार हालसम्म ९५ प्रतिशत घरधुरीमा विद्युतकाे पहुँच पुगेकाे छ ।
