ऊर्जा खबर
काठमाडौं । हिमाली हाइड्रो फन्ड प्रालिले ९ मेगावाटको सोना खोला जलविद्युत आयोजना निर्माण गर्ने भएको छ । कम्पनीले प्रदेश नम्बर १ को ताप्लेजुङ जिल्लाको मिक्वा खोला गाउँपालिका भएर बग्ने खोलामा पहिचान भएको आयोजना अघि बढाउन लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ दिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङकन प्रतिवेदन र आयोजनाको अध्यययन रिपोर्टका आधारमा प्रवद्र्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवालसँग समक्ष आग्रह गरेको छ ।
विभाग वा प्रवद्र्धक कम्पनीको कार्यालयमा प्राप्त हुने गरी राय/सुझाव पठाउन सरोकारवालाले पठाउन सक्ने विभागले जनाएको छ । आयोजनाको सम्पूर्ण संरचना खोलाको बायाँ किनारामा रहने गरी डिजाइन तयार पारिएको कम्पनीले जनाएको छ ।
आयोजनाको बाँधमा जम्मा भएको पानी करिब एक हजार एक सय एक मिटर लामो पाइप र १.६ किलोमिटर सुरुङमार्फत विद्युतगृहमा पुर्याइनेछ । विद्युतगृहमा जडित २ वटा टर्वाइनमा पानी खसाली टर्वाइनमा जडान भएको जेनेरेटर मार्फत विद्युत उत्पादन गरिनेछ ।
आयोजनाबाट २०८० कात्तिक ३० गतेदेखि विद्युत उत्पादन हुने गरी प्रस्ताव पेश गरिएको कम्पनीले जनाएको छ । कम्पनीका अनुसार ५६.६८ गिगावाट घन्टा विद्युत उत्पादन हुनेछ ।
उत्पादीत विद्युत ३३ केभी प्रसारण लाइन मार्फत ८ किलोमिटर दुरीमा रहेको नेपाल विद्युत प्राधिकरण÷राष्ट्रिय प्रसारण ग्रिड कम्पनीको मेवा सबस्टेसनमा जोडिनेछ ।
