ऊर्जा खबर
काठमाडौं । दार्चुलामा २८.३०४ मेगावाटको मध्य चमेलिया जलविद्युत आयोजना निर्माण हुने भएको छ । जिल्लाको मर्मा गाउँपालिकामा दार्जुला पावर प्रालिले आयोजना निर्माण गर्न लागेको हो ।
करिब ६ अर्ब २३ करोड रुपैयाँ लगानीमा आयोजना निर्माण गर्न लागिएको कम्पनीले जनाएको छ । कम्पनीका अनुसार आयोजनाको वातावरणीय प्रभाव मुल्यांकन प्रतिवेदन (इआईए) तयार भएको छ ।
प्रतिवेदनअनुसार आयोजनाले वर्षायाममा ११८.५२ गिगावाट घन्टा र सुख्खायाममा ६७.१० गिगावाट घन्टा विद्युत गरी समग्रमा १८५.६२ गिगावाट घन्टा बिजुली उत्पादन हुनेछ ।
आयोजना निर्माणका लागि ३६.२९६४ हेक्टर क्षेत्रफल जग्गा आवश्यक पर्ने प्रतिवेदनमा उल्लेख छ । आयोजनाले ओगट्ने जमिन र एसपीएएफको लागि ६ करोड ५१ लाख १७ हजार रुपैयाँ खर्च हुने लागत अनुमान गरिएको छ ।
त्यसैगरी, निजी रुख कटानको क्षतिपूर्तिमा ५ लाख १० हजार रुपैयाँ, एक सिजनको अन्नको क्षतिपूर्ति ५४ लाख ६९ हजार रुपैयाँ, वातावरण प्रभाव न्यूनिकरण र व्यवस्थापनका लागि ३ करोड ९४ लाख ६६ हजार रुपैयाँ खर्च हुने अनुमान गरिएको छ ।
साथै, ५४ लाख ६९ हजार रुपैयाँ वातावरण अनुमान लागत गरी र २५ लाख रुपैयाँ वातावरणीय परिक्षण लागत गरी ११ करोड ६० लाख ३३ हजार रुपैयाँ खर्च हुने अनुमान गरेको छ । आयोजना निर्माण सुरु भएको ३ वर्षमा सम्पन्न गर्ने कम्पनीको लक्ष्य छ ।
