ऊर्जा खबर
काठमाडौं । आँबुखैरेनी गाउँपालिका–४ स्थित मर्स्याङ्दी जलविद्युत केन्द्रको विद्युत उत्पादन क्षमता वृद्धि भएको छ । ६९ मेगावाट क्षमताको केन्द्रको उत्पादन हिउँदको तुलनामा बढेको हो ।
हिउँदको समयमा ४० मेगावाट उत्पादन हुँदै आएकोमा केन्द्रमा अहिले ५५ मेगावाट उत्पादन भइरहेको केन्द्रका प्रमुख बद्री फुँयालले बताए । ‘पछिल्लो समय वर्षा हुन थालेपछि उत्पादन बढेको छ, पूर्ण क्षमतामा उत्पादन भने हुन सकेको छैन,’ उनले भने, ‘पूर्ण क्षमताको विद्युत् उत्पादन हुन अझै १४ मेगावाट विद्युत् पुगेको छैन, लामो खडेरी परेका कारण नदीमा मिसिने खोला, झरना, खोल्सीको पानी घटेको र कतिपय सुकेकाले पूर्ण क्षमतामा उत्पादन हुन नसकेको हो ।’
यो समयमा प्रशस्त पानी पर्ने समय भए पनि लामो समयसम्मको खडेरीका कारण नदीमा पानीको बहाव बढ्न नसक्दा सोचेअनुरुपको विद्युत उत्पादन बढ्न नसकेको केन्द्रले जनाएको छ । साँझ र बिहान बिजुलीको माग धेरै हुने भएकाले नदीको पानी दिउँसो रिजर्भ ट्यांकीमा जम्मा गरी लैजाने र साँझ बिहान भने पूर्ण उत्पादन बढाउन लागिएको उनले बताए ।
साँझ ५ बजेदेखि १० बजेसम्म र बिहान ५ बजेदेखि १० बजेको समयमा बढी विद्युत खपत हुने भएकाले थुनेर राखेको पानीलाई छाडेर पूर्ण क्षमतामै उत्पादन गर्ने गरिएको छ । विद्युतको माग धेरै भएको समयमा ३ वटा युनिटबाट २३÷२३ मेगावाटका दरले पूर्ण क्षमताअनुरूपको ६९ मेगावाट विद्युत उत्पादन भइरहेको छ । यस केन्द्रबाट उत्पादित विद्युत चितवनको भरतपुरबाट काठमाडौंको स्टेसनमार्फत राष्ट्रिय प्रसारण लाइनमा जोडिएको छ ।
