ऊर्जा खबर
काठमाडौं । सिनर्जी पावर डेभलपमेन्ट कम्पनीको गत आर्थिक वर्ष २०७७/७८ को वित्तीय विवरण कमजोर देखिएको छ । कम्पनीको विद्युत बिक्रीबाट हुने आम्दानी घटेसँगै खुद नाफा पनि घटेको छ ।
कम्पनीले सार्वजनिक गरेको वित्तीय विवरण अनुसार गत आवमा ८ करोड २७ लाख ४९ हजार रुपैयाँ खुद नाफा कमाएको छ । यो अघिल्लो वर्ष २०७६/७७ को तुलनामा २ करोड ६३ लाख ६९ हजार रुपैयाँ कम हो । कम्पनीले अघिल्लो वर्ष १० करोड ९० लाख ७८ हजार रुपैयाँ खुद नाफा कमाएको थियो ।
यस अवधिमा कम्पनीले दोलखामा सञ्चालित १० मेगावाटको सिप्रिङ खोलाको विद्युत बिक्री गरी २० करोड १५ लाख ७५ हजार रुपैयाँ आम्दानी गरेको छ । अघिल्लो वर्ष यही समयअवधिमा २३ करोड ६२ लाख २९ हजार रुपैयाँ आम्दानी गरेको थियो । यस्तै, कम्पनीले अन्य स्रोतबाट १ लाख ४८ हजार रुपैयाँ आम्दानी गरेको छ ।
हिउँदयाममा खोलाको जलस्तरमा कमी आएको कारण विद्युत बिक्रीबाट हुने आम्दानी घटेको कम्पनीले जनाएको छ । कम्पनीका अनुसार नेपाल विद्युत प्राधिकरणबाट सुचिकृत दर (पोष्टेड रेट) को अवधि समाप्त भई पुरानै विद्युत बिक्री दर कायम भएकोले आम्दानीमा कमी आएको हो ।
यस्तै, कम्पनीले सोलुखुम्बु जिल्लामा निर्माण हुने २२ मेगावाटको होङगु खोलामा ४० प्रतिशत स्वपुँजी लगानी गर्ने भएको छ ।आयोजनाको प्राधिकरणसँग विद्युत खरिद सम्झौता सम्पन्न भई सानिमा बैंकको अगुवाईमा वित्तिय व्यवस्थापन सम्पन्न भएको छ ।
.jpg)
