ऊर्जा खबर
काठमाडौं । नेपाल विद्युत प्राधिकरणले निर्माण गरेको ३३ केभी माल्टा- उनीचौर प्रसारण लाइन सञ्चालनमा आएको छ । लगनखेल वितरण केन्द्रको कार्य क्षेत्रभित्र पर्ने ललितपुर जिल्ला बागमती गाउँपालिकाको माल्टादेखि माहाँकाल गाउँपालिकाको उनीचौर सबस्टेसन सम्मकाे लाइन सञ्चालनमा आएको हो ।
लाइन माल्टादेखि यास्पा, सतेली, छपेली, खानी डाँडा, इकुडोल बेसी, कोन्ज्योसोम गाउँपालिकाको भकारी डाँडा, खत्तौर, ठुला पाखा हुँदै माहाँकाल गाउँपालिकाको उनीचौर सबस्टेसनसम्म निर्माण गरिएकाे छ । उनीचौर सबस्टेसन सञ्चालन गर्नका लागि उक्त प्रसारण लाइन १५ गते (शुत्रबार) देखि सञ्चालन गरेको लगनखेल वितरण केन्द्रले जनाएको छ ।
केन्द्रका अनुसार उक्त स्थानको ३३ केभी प्रसारण लाइनमा जडान गरिएको पोल, तार, स्टे लगायतका विद्युतीय उपकरणहरू नछुन र घर पालुवा जनावरहरूलाई पोल तथा स्टेमा नबाध्न तथा आफ्ना बालबालिकालाई समेत उक्त विषयमा सचेत गराउन आग्रह गरेको छ ।
उक्त स्थानको विद्युत लाइनमा रुखका हाँगाबिगा तथा बाँसले छोएको देखिएमा, कुनै स्थानमा स्पार्क आएमा वा अन्य कुनै खतरा देखिएमा केन्द्रमा जानकारी गराउन पनि आग्रह गरेको छ ।
