सुपरमाईकाे विद्युत् उत्पादन सुचारु, विवाद समाधान गर्न वार्ता हुँदै

काठमाडौं ।  इलामस्थित ७.८ मेगावाटको सुपर माई जलविद्युत् केन्द्रको उत्पादन सुचारु भएको छ । स्थानीयले विभिन्न माग राख्दै सोमबार रातीदेखि आयोजनाको उत्पादन बन्द गराएका थिए । आयोजना पक्ष र स्थानीयबीच सामान्य वार्ता भएपछि मंगलबार दिउँसो साढे ४ बजेपछि बल्ल आयोजनाको विद्युत् उत्पादन पुनः सुचारु भएको हो । 

इलाम नगरपालिका र माईजोगमाई गाउँपालिकाबीचको माई खोलामा सञ्चालित उक्त जलविद्युत केन्द्रको उत्पादन बन्द हुँदा एक दिनमै ५ लाख बराबरको क्षति भएको आयोजनाका प्रमुख कार्यकारी अधिकृत (सिईओ) दिनेशकुमार बर्तौलाले जानकारी दिए । 

‘सुरुमा स्थानीयवासीले माग गरेको ३० घण्टा सडक मर्मतका लागि स्काभेटर दिने भनिएको र वडाबाट सिफारिस लिएर आएपछि हामीले सहयोग गर्‍यौँ,’ सिइओ बर्तौलाले भने, ‘तर त्यो माग पूरा भएपछि पनि अन्य ठूला मागहरु लिएर उहाँहरू आउनुभयो र कम्पनीको हाताभित्र प्रवेश गरेर अराजक गतिविधि गर्दै उत्पादन बन्द गर्न लगाउनुभयो ।’  

सामान्य छलफलपछि मंगलबारबाट बेलुकीपखदेखि नै आयोजनाको उत्पादन सुचारु भइसकेको छ ।

‘बिहीबार जिल्ला प्रशासन कार्यालय, स्थानीयबासी र आयोजना प्रवर्द्धक कम्पनीसँग विस्तृत वार्ता गरी समस्याको दीर्घकालीन समाधानका लागि पहल गर्छौं,’ उनले ऊर्जा खबरसँग भने ।  

पछिल्लो समय पब्लिक लिमिटेड कम्पनी बनेपछि ५० हजारभन्दा बढी लगानीकर्ता रहेको कम्पनीले एकल निर्णय गर्न नपाइने भएकाले माग पूरा गर्न समय लागेको कम्पनीले जनाएको छ ।