ऊर्जा खबर
काठमाडौँ । नेपाल विद्युत् प्राधिकरणले पाल्पा सबस्टेसन तथा प्रसारण लाइन निर्माण गर्ने भएको छ । कुश्मा–न्यु बुटवल २२० केभी प्रसारण लाइन अन्तर्गतको टावर नम्बर एपी ५७/० र एपी ५७/१ को बीचबाट शुरू भई करिब ३५० मिटरको दूरीमा पर्ने माडी फाँटमा निर्माण गर्न प्रस्ताव गरिएको पाल्पा सबस्टेसन हुँदै २८५ मिटर दूरीमा पर्ने सोही जिल्लाको कालीगण्डकी–बुटवल १३२ केभी लाइनको टावर नम्बर ०२९/१ र ०३०/० को बीचसम्म कुल ६३५ मिटर लामो प्रसारण लाईन निर्माण गर्ने भएको हो । त्यस्तै, यही आयोजना अन्तर्गत २२०/१३२/३३/११ केभीको पाल्पा सबस्टेसन समेत निर्माण गरिने भएको हो ।
आयोजना अन्तर्गत निर्माण हुने २२० केभी डबल सर्किट लाइनबाट १००० मेगावाटसम्म र १३२ केभी डबलसर्किट लाइनबाट १६८ मेगावाटसम्म विद्युत् प्रसारण गर्न सकिने जनाएको छ ।
प्रसारण लाइनका लागि ४ वटा टावर निर्माण गरिने र यसका लागि कुल ९.०४ हेक्टर जमिन आवश्यक पर्ने र जम्मा ४ वटा टावर निर्माण गरिने जनाइएको छ ।
आयोजना निर्माणका लागि प्राधिकरणले अनुमति माग्दै विद्युत् विकास विभागमा आवेदन दिएको छ । विभागले भने आयोजना निर्माण गर्दा उल्लेखनीय वातावरणीय प्रभाव पर्ने भएमा सम्बन्धी जोसुकैले विभाग वा प्राधिकरणमा ३५ दिनभित्र लिखित रायसुझाव पेश गर्न आग्रह गर्दै शुक्रबार सूचना जारी गरेको छ ।
त्यस्तै, आयोजनाको निर्माण ३९ महिनामा पूरा गर्ने प्राधिकरणको लक्ष्य छ ।
