ऊर्जा खबर
काठमाडौं । नेपाल विद्युत प्राधिकरण बर्दघाट वितरण केन्द्रले २४ लाख रुपैयाँ विद्युत महशुल बक्यौता उठाएको छ । केन्द्रले आर्थिक वर्ष सुरु भएदेखि हालसम्मको अवधिमा ग्राहकको लाइन काटी बक्यौता उठाएको हो ।
डेठ महिनाको अवधिमा १ सय ४४ ग्राहकको लाइन काटी बक्यौता असुली गरेको केन्द्रले जनाएको छ । केन्द्रका अनुसार केन्द्र अन्तर्गतको ५८ र त्रिवेणी उप–वितरण केन्द्र अन्तर्गतको ८६ ग्राहकको लाइन काटिएको हो । लाइन काटिएका ग्राहकबाट ८९ लाख ४० हजार रुपैयाँ असुली गर्न बाँकी थियो ।
लाइन काटिएका ग्राहकले जरीवानासहितको २३ लाख ७८ हजार ५ सय रुपैयाँ बक्यौता बुझाएपछि पुन लाइन जोडिएको छ । बाँकी ग्राहकले पनि बक्यौता बुझाएपछि जोडिनेछ ।
लामो समयदेखि विद्युत महशुल नबुझाउने ग्राहकको धमाधम लाइन काटेर बक्यौता उठाउने कामलाई तिव्रता दिइएको केन्द्रले जनाएको छ । बारम्बार ताकेता गर्दा पनि बक्यौता नबुझाएपछि लाइन काट्नु पर्ने अवस्था आएको हो । केन्द्र अन्तर्गत अझै करिब ४ करोड ९० लाख २५ हजार रुपैयाँ बक्यौता उठाउन बाँकी छ ।
केन्द्र अन्तर्गत २४ हजार ९ सउ ७६ ग्राहक छन् । जसमा २३ हजार ८ सय २१ जना घरयासी ग्राहक छन् ।
