ऊर्जा खबर
काठमाडौं । नेपाल विद्युत प्राधिकरणले ३३/११ केभीको सेढवा सबस्टेसन चार्ज गरेको छ । पर्सा जिल्लाको विद्युत आपूर्तिको गुणस्तर सुधार तथा स्तरोन्नति गर्ने उद्देश्यले निर्माण भएको सबस्टेसन आइतबारदेखि चार्ज भएको हो ।
सबस्टेसन अहिले लोडमा चार्ज गरिएको प्राधिकरण पोखरिया वितरण केन्द्र प्रमुख जगननाथ झाले बताए । उनका अनुसार उद्योग र घरायसी ग्राहकले पाउने विद्युत सेवाको गुणस्तर सुधार तथा प्रणालीको स्तरोन्नति गर्न सबस्टेसन निर्माण सम्पन्न गरी सञ्चालनमा ल्याएको हो ।
सबस्टेसन चार्ज भएपछि विशेष गरी ठोरी, जिराभवानी, जगरनाथपुर गाउँपालिकाको भोल्टेजमा सुधार, ट्रिपिङ घट्ने, चुहावट घट्ने साथै विद्युत बिक्री बढ्नेछ ।
सबस्टेसनमा ६.८ एमभीएको ट्रान्सफर्मर जडान गरिएको छ । सबस्टेसनमा ३ वटा फिडर निकालिएको छ । यसअघि पोखरीयादेखि ठोरीसम्मको १२५ किलोमिटर लामो ११ केभी लाइनमार्फत विद्युत ल्याएर वितरण भइरहेको थियो ।
आयोजनाको काम ४ वर्ष अघिदेखि नै सुरु भएको हो । तर, विश्वव्यापी रुपमा फैलिएको कोरोना महामारीका कारण करिब २ वर्ष नै काम प्रभावित भएको थियो । केन्द्रअन्तर्गत ३८ हजार ग्राहकले सेवा लिइरहेका छन् ।
.jpg){kind=spacer}
