ऊर्जा खबर
मुस्ताङ । कोरला नाकाबाट चालु आर्थिक वर्षको ५ महिनामा २ हजार ७४ विद्युतीय सवारीसाधन नेपाल भित्रिएका छन् । आइतबारदेखि कोरला नाकाबाट थप चिनियाँ विद्युतीय सवारीसाधन नेपाल भित्रिने क्रममा रहेको मुस्ताङ भन्सार कार्यालयका प्रमुख रमेश खड्काले जानकारी दिए ।
उनका अनुसार यसै महिना चीनको बिवाइडी कम्पनीले कोरला नाकाबाट ५०० भन्दा बढी विद्युतीय सवारीसाधन नेपाल पठाएको छ । सोही कम्पनीका ३०० भन्दा बढी विद्युतीय सवारी भन्सार जाँचपास भई गन्तव्यतर्फ प्रस्थान गरिसकेका छन् । कोरला नाका हुँदै मुस्ताङ भन्सार कार्यालयबाट जाँचपास भई आयात–निर्यात भएका मालवस्तु तथा विद्युतीय सवारीसाधनबाट ५ अर्ब ६ करोड ६२ लाख राजस्व सङ्कलन भएको उनले बताए ।
नेपाली बजारमा विद्युतीय कारको प्रयोग बढ्दै गएकाले पछिल्लो समय नेपालका विभिन्न कम्पनीले कोरला नाकाबाट चीनमा बनेका विद्युतीय सवारीसाधन आयात गर्दै आएका छन् । इन्धनको बचत तथा कार्बन उत्सर्जन घटाउन यस प्रकारका विद्युतीय सवारीसाधन उपयोगी हुने भएकाले सरकारले यस्ता सवारीसाधनलाई भन्सार सहुलियत प्रदान गरिएकाले नेपालमा विद्युतीय सवारीसाधनको माग बढेको हो ।
हिउँदयामको प्रतिकूल मौसममा समेत चीनबाट धमाधम कोरला नाका हुँदै विद्युतीय सवारीसाधन भित्रिएपछि कोरला नाकाको चहलपहल र भन्सार कार्यालयको कार्यसम्पादन गतिशील बनेको छ । हिउँदयामसँगै ४ हजार ६१० मिटरको उचाइमा रहेको यो नाकामा बिहान र बेलुकीको तापक्रम माइनस २० डिग्री रहेको छ । प्रतिकूल मौसमका बाबजुद कोरला नाकाबाट विद्युतीय सवारीसाधन नेपाल भित्रिरहेका छन् ।
भन्सारमा जाँचपास सकेका विद्युतीय सवारीसाधनलाई जोमसोमसम्म र जोमसोमबाट पोखरासम्म चालकले गन्तव्यतर्फ पुर्याउन थालेका छन् । यसरी मुस्ताङबाट बाहिरिएका विद्युतीय सवारीसाधनलाई पोखराबाट अर्को चालक समूहले सम्बन्धित कम्पनीको शोरुमसम्म पुर्याउने गरेका छन् ।
त्यसअघि यहाँ भित्रिने विद्युतीय सवारीसाधनलाई चिनियाँ भन्सारबाट स्थानीय सीमापार पास भएका चालकले नाकाको नेपालतर्फ बाहिर निकाल्ने काम गर्छन् । प्रतिकूल मौसमका कारण कोरला नाका बन्द हुने अनुमान गरिए पनि चीनतर्फबाट धमाधम मालवस्तु र विद्युतीय सवारीसाधन भित्रिँदा कोरला नाकाबाट दुई देशबीचको आयात–निर्यात चलायमान भएको हो ।
नाकाबाट धमाधम विद्युतीय सवारीसाधन भित्रिन थालेपछि बेनी–जोमसोम–कोरला सडकमा सञ्चालित विद्युतीय ‘चार्जिङ स्टेसन’मा समेत विद्युतीय सवारी साधनको भीड लाग्न थालेको छ ।
हिउँदयामको मौसममा माथिल्लो मुस्ताङका नागरिक धमाधम बेँसी झरिसकेको भए पनि कोरला नाकामा आयात–निर्यातको कारोबार घटेको छैन । भन्सार प्रमुख खड्काले विद्युतीय सवारीसाधनका अलावा हालसम्म दैनिक १०÷१२ मालवाहक कन्टेनर मालवस्तु नेपाल–चीन निकासी–पैठारी भइरहेको जानकारी दिए ।
गत ३० भदौदेखि पूर्णरूपमा सञ्चालनमा आएको यो नाकाबाट चालु आर्थिक वर्षको १० पुससम्ममा ११ अर्ब १ करोड ९५ लाख रुपैयाँबराबरको सामान निकासी–पैठारी भएको छ । यसमध्ये चीनबाट १० अर्ब ८२ करोड ९८ लाख रुपैयाँको मालवस्तु भित्रिएको छ भने नेपालबाट हस्तकलालगायतका नेपाली उत्पादन १८ करोड ९७ लाख ७८ हजार रुपैयाँका मालवस्तु चीन निर्यात भएको छ ।
