ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री दीपक खड्का र नेपालका लागि दक्षिण कोरियाली राजदूत पार्क ताइ योङबीच द्विपक्षीय सहकार्यका विषयमा छलफल भएको छ । मन्त्रालयमा मंगलबार भएको शिष्टाचार भेटका क्रममा द्विपक्षीय सहकार्यका विषयमा छलफल भएको हो ।
भेटवार्ताका क्रममा आगामी सेप्टेम्बर १६ देखि १८ तारिकसम्म कोरियामा हुने ग्लोबल इन्फ्रास्ट्रक्चर कर्पोरेशन कन्फ्रेन्स (जिआइसिसी) –२०२५ को तयारीसम्बन्धी विषयमा विशेष छलफल भएको थियो । राजदूत योङले हालसम्म ३५ देशले उक्त कार्यक्रममा सहभागिता सुनिश्चित गरिसकेको जानकारी दिँदै नेपालका ऊर्जा परियोजनाहरूलाई अन्तर्राष्ट्रिय जगतमा प्रस्तुत गर्न यसलाई महत्त्वपूर्ण अवसरका रूपमा उपयोग गर्न सकिने विश्वास व्यक्त गरे ।
सो अवसरमा अपर त्रिशूली–१ जलविद्युत् आयोजना र प्रसारण लाइन आयोजनासहित नेपालमा कोरियाली सहयोगमा अघि बढिरहेका विभिन्न परियोजनाका विषयमा समेत विस्तृत कुराकानी भएको थियो ।
मन्त्री खड्काले नेपालमा भइरहेको कोरियाली सहयोग र लगानीप्रति आभार व्यक्त गर्दै प्रसारण लाइन र अन्य ऊर्जा पूर्वाधार परियोजनामा भइरहेको सहकार्यलाई सकारात्मक मोडमा अघि बढाइरहने प्रतिबद्धता जनाए । उनले नेपालको ऊर्जा, जलस्रोत तथा सिँचाइ क्षेत्रमा अझ थप कोरियाली लगानी आकर्षित हुने विश्वास व्यक्त गरे ।
दुवै पक्षले जिआइसिसी २०२५ मार्फत नेपालको जलविद्युत् क्षेत्रका सम्भावना तथा लगानी अवसरलाई उजागर गर्न सकिने र यसले द्विपक्षीय ऊर्जा सहकार्यलाई नयाँ उचाइमा पुर्याउने विश्वास व्यक्त गरेका छन् ।
.jpg)
