ऊर्जा खबर
काठमाडौं । सिन्धुपाल्चोक जिल्लामा ७.५ मेगावाटको इन्द्रावती तेस्रो जलविद्युत आयोजना निर्माण गरी सञ्चालनमा ल्याएको नेशनल हाइड्रो पावर कम्पनी लिमिटेडले हकप्रद सेयर निष्कासन गर्ने भएको छ । नेपाल धितोपत्र बोर्डले १०ः५ अनुपातको सेयर निष्कासन अनुमति दिएपछि कम्पनीले असार २९ गतेदेखि सेयर निष्कासन गर्न लागेको हो ।
सय रुपैयाँमा अंकित ८२२,१४५,९७१.७८ रुपैयाँ बराबरको ८,२२१,४५९.७१७८ कित्ता हकप्रद सेयर निष्कासन गर्न अनुमति पाएको कम्पनीले जनाएको छ । कम्पनीका अनुसार हकप्रद सेयर निष्कासन पश्चात प्राप्त रकम २६.१५ मेगावाटको ३ जलविद्युत आयोजनामा लगानी हुनेछ ।
निर्माणाधीन १४.१५ मेगावाटको तल्लो इर्खुवामा १२.२७ करोड, ४.५ मेगावाटको तल्लो इन्द्रवतीमा ५६.१७ करोड रुपैयाँ लगानी गरिने कम्पनीले जनाएकाे छ । यसैगरी, सञ्चालनमा रहेकाे ७.५ मेगावाटको इन्द्रवती तेस्रो जलविद्युत आयोजनाकाे जिर्ण उपकरण फेरबदल गरिनेछ । यसका लागि १३.७७ करोड रुपैयाँ लगानी अावश्यक पर्नेछ ।
कम्पनीको सेयरमा साउन १८ गतेसम्म आवेदन दिन सकिनेछ । कम्पनीले हकप्रद सेयर निष्कासन गरी बाँडफाँड गर्न मुक्तिनाथ क्यापिटल लिमिटेडलाई बिक्री प्रबन्धक तोकेको छ ।
कम्पनीको सिन्धुपाल्चोकमा निर्माण गरेको इन्द्रावती तेस्रो सञ्चालनमा छ । यस्तै, ४.५ मेगावाटको तल्लो इन्द्रावतीको पनि अध्ययन गरिरहेको छ । तोकिएको सयममा लक्षित प्रगति हासिल गर्न नसकेको भन्दै यसअघि खारेज भएको आयोजनाको पुनःअध्ययन अनुमति प्राप्त गरि अध्ययन थालेको हो । कम्पनीले ४० प्रतिशत निर्माण पूरा गरेपछि अनुमतिपत्र खारेज गरेर सरकारको बास्केटमा राखिएको थियो ।
यसैगरी, भोजपुरमा सहायक कम्पनीमार्फत १४.१५ मेगावाटको इर्खुवा खोला जलविद्युत आयोजना निर्माण गरिरहेको छ । यो आयोजनाको काम पनि अन्तिम चरणमा पुगेको छ ।
