सिमेन्ट उद्योगहरूले मात्र भारतबाट मासिक साढे ६ अर्बको कोइला आयात

काठमाडौं । नेपालले सिमेन्ट उद्योगको प्रयोजनका लागि मात्र भारतबाट करिब साढे ६ अर्ब रुपैयाँ बराबरको कोइला आयात गर्ने गरेको पाइएको छ । ६६ वटा सिमेन्ट उद्योग सञ्चालन गर्न मासिकरूपमा उक्त रकमको कोइला आयात भइरहेको हो ।

सिमेन्ट उद्योगमा क्लिंङ्कर उत्पादन गर्न मासिक ६ अर्ब ३० करोड रुपैयाँ बराबरको कोइला आयात हुने गरेको सिमेन्ट उत्पादक संघका अध्यक्ष ध्रुवराज थापाले बताए । ‘हाल सञ्चालनमा रहेका ६६ उद्योगले मासिक १२ लाख ५० हजार मेट्रिक टन सिमेन्ट उत्पादन गर्ने क्षमता रहेको छ,’ उनले ऊर्जा खबरसँग भने, ‘अब हामी निर्यात गर्न सक्ने अवस्थामा पुगेका छौं ।’

संघका अनुसार सञ्चालनमा रहेका यी उद्योगहरूले वार्षिक १ करोड ५० लाख मेट्रिक टन सिमेन्ट उत्पादन गरिरहेको वार्षिक १ करोड टन निर्यात गर्न सक्ने क्षमता रहेको छ । कोइला आयातको परिमाण हेर्दा वार्षिक ७५ अर्ब ६० करोड रुपैयाँ बराबर भारत गइरहेको छ ।

अन्तराष्ट्रिय बजारमा कोइलाको अभावसँगै यसको प्रत्यक्ष प्रभाव सिमेन्ट उद्योगहरूलाई परिरहेको छ । क्लिंङ्कर उद्योगहरूले पर्याप्त मात्रामा कोइलाहरू नपाएकै कारण सिमेन्ट उद्योगहरू पूर्ण क्षमतामा सञ्चालन हुन पाएका छैनन् ।

यी उद्योगहरु पूर्ण क्षमतामा सञ्चालन गर्ने हो भने १ खर्ब २६ अर्ब रुपैयाँ भारत जानेछ । नेपालमा सञ्चालनमा रहेका यी उद्योगहरूको क्षमता १२०० देखि ४ हजार मेट्रिक टनसम्मका छन् । एक टन सिमेन्ट उत्पादन गर्न ३५ युनिट बिजुली आवश्यक पर्ने पनि थापाले बताए । उद्योगहरूले दैनिक  ९ लाख ५९ हजार युनिट विद्युत खपत गर्ने सक्ने थापाले जानकारी दिए ।