ऊर्जा खबर
काठमाडौं । तल्लो तथा माथिल्लो भाेल्टेज स्तरको थ्री फेज विद्युत लिन इच्छुक ग्राहकले अनलाइन प्रविधिबाट आवेदन दिन सक्ने भएका छन् । नेपाल विद्युत प्राधिकरणले बिहिबार एक सुचना जारी गर्दै थ्री फेज विद्युत आपूर्ति लिन इच्छुक ग्राहकलाई सहज रुपमा सेवा उपलब्ध गराउन अनलाइन प्रणाली सुरु गरेको हो ।
केहि समय पहिलेदेखि नै परिक्षणका रुपमा सुरु रहेको अनलाईन प्रविधि सफल भएपछि देशव्यापी रुपमा सुरु गरिएको प्राधिकरणको वितरण तथा ग्राहक सेवा निर्देशनालयले जनाएको छ ।
थ्री फेज लाइन लिनका लागि सेवाग्राहीहरुले सास्ती खेप्नु परेको गुनासो बढेपछि अनलाइनबाटै आवेदन दिन मिल्ने बनाइएको प्राधिकरणले जनाएको छ । थ्री फेज लाइनको सप्लाइ लिन चाहने सेवाग्राहीले प्राधिकरणको वेबसाइटको दायाँ साइटको माथिल्लो भागमा रहेको थ्री फेज अनलाइन आवेदनु मा क्लिक गरि आवश्यक विवरणहरु पेस गरि आवेदन दिन सक्नेछन् ।
पेस भएका कागजातहरु पर्याप्त छन्/छैनन् लगायत आवेदन स्वीकृति आदिको जानकारी समेत अनलाइनबाटै लिन सकिनेछ । अनलाइन आवेदन दिएपछि सेवाग्राहीलाई दर्ता नम्बरसहितको एसएमएस आउँछ । दर्ता नम्बरका आधारमा अलरेडी रजिष्टर्ड अप्सनमा गएर आफ्नो फाइल ट्रयाक गर्न सकिने प्राधिकरणले जनाएको छ ।
