ऊर्जा खबर
काठमाडौं । स्वेतगंगा हाइड्रोपावर एन्ड कन्स्ट्रक्सन लिमिटेडले साधारण सेयर निष्कासन अनुमति पाएको छ । कम्पनीले रामेछापमा निर्माणाधीन २८.१ मेगावाटको तल्लो लिखु खोला जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन अनुमति पाएको हो ।
नेपाल धितोपत्र बोर्डले करिब ४० लाख कित्ता साधारण सेयर निष्कासन अनुमति दिएको कम्पनीले जनाएको छ । कम्पनीका अनुसार सय रुपैयाँ अंकित ३९ करोड ८२ लाख ५० हजार रुपैयाँ बराबरको ३९ लाख ८२ हजार ५ सय कित्ता साधारण सेयर निष्कासन गर्ने तयारी गरिएको छ ।
कम्पनीले सेयर निष्कासन गरी बाँडफाँड गर्न सानिमा क्यापिटललाई बिक्री प्रबन्धक नियुक्त गरेको छ । पहिलो चरणमा आयोजन प्राभावित स्थानीय र दोस्रो चरणमा सर्वसाधारणका लागि सेयर निष्कासन गरी बाँडफाँड गरिनेछ ।
कम्पनीले निर्माण गरीरहेको आयोजनाको काम आधा भन्दा बढी सकिएको छ । आयोजना सम्पन्न भएपछि उत्पादन हुने विद्युत नेपाल विद्युत प्राधिकरणको प्रस्तावित १३२ केभी न्यू खिम्ती सव–स्टेसनमार्फत राष्ट्रिय प्रसारण प्रणालीमा जोड्ने योजना रहेको छ ।
