ऊर्जा खबर
काठमाडौं । नेपाल विद्युत प्राधिरणले निर्माण गरिरहेको २२०/१३२ केभी क्षमताको नयाँ भरतपुर र उदिपुर सबस्टेसनको काम अन्तिम चरणमा पुगेको छ । मर्स्याङ्दी कोरिडोर प्रसारण लाइन अन्तर्गत निर्माणाधीन ४ मध्ये २ सबस्टेसनको काम सकिन लागेको हो ।
लाइनको चितवनको नयाँ भरतपुर, लमजुङको उदीपुरमा निर्माणाधीन सबस्टेसनको मुख्य सिभिल संरचनाको काम सकिन लागेको प्राधिकरणले जनाएको छ । प्राधिकरणका अनुसार अहिले दुबै सबस्टेसनको उपकरण जडानको काम भइरहेको छ ।
यस्तै, लमजुङमै निर्माणाधीन खुदी सबस्टेसनको काम पनि आगामी एक वर्षभित्र सम्पन्न गरिनेछ । मनाङको धारापानीमा रहेकाे सबस्टेसनको भने निर्माण सुरु गरिएको छ । भौगोलिक रुपमा विकट ठाउँमा रहेकाले धारापानी सबस्टेसनको निर्माणमा केही समय लाग्नेछ ।
प्राधिकरणका कार्यकारी निर्देशक कुलमान घिसिङ नेतृत्वको उच्च व्यवस्थापन टोलीले स्थलगत अनुगमन भ्रमणमार्फत सबस्टेसन निर्माणमा भइरहेको प्रगति, बेहोरिएका समस्या, काम सम्पन्न हुने तालिका लगायतका विषयमा आयोजना व्यवस्थापन, परामर्शदाता र निर्माण व्यवसायीहरूसँग विस्तृत छलफल गरी जानकारी लिएको प्राधिकरणले जनाएको छ ।
भ्रमणको क्रममा घिसिङले मर्स्याङदी कोरिडोरमा निर्माणाधीन निजी क्षेत्रका जलविद्युत आयोजनाको विद्युत प्रवाहका लागि प्रसारण लाइन तथा सबस्टेसन महत्वपूर्ण भएकोले तोकिएकै समयमा सम्पन्न गर्न आग्रह गरे ।
घिसिङले वन क्षेत्रको जग्गा प्रयोग तथा रुख कटानका लागि स्वीकृतिको प्रक्रिया तत्काल अगाडि बढाउन र सामाजिक समस्याहरुलाई समाधान गरी प्रसारण लाइनको निर्माण सुरु गर्न आयोजना व्यवस्थापनलाई निर्देशन दिए । यसका लागि माथिल्लो तहमा आवश्यक पहल र समन्वय गर्न आफू तयार रहेको उनले बताए ।
लमजुङको दोर्दी खोलामा निर्माणाधीन जलविद्युत आयोजनाहरुको विद्युत दोर्दी करिडोर प्रसारण लाइनमार्फत उदिपुर सबस्टेसनमा जोडिने छ । उदिपुर सबस्टेसनको निर्माणमा केही समय लाग्ने देखिएपछि दोर्दी खोलाका आयोजनाहरुको विद्युत वैकल्पिक व्यवस्थामार्फत हाल सञ्चालनमा रहेको मध्य मर्स्याङ्दीको विद्युतगृहको स्वीचयार्डमा जोडिनेछ ।
लमजुङकै ङादी तथा त्यसका सहायक खोलाहरुमा निर्माणाधीन जलविद्युत आयोजनाहरुको विद्युत खुदी सबस्टेसनमा जोडिने छ । मर्स्याङ्दी र त्यसका सहायक नदीहरुबाट उत्पादन हुने विद्युत राष्ट्रिय प्रसारण प्रणालीमा प्रवाहका लागि मर्स्याङ्दी कोरिडोर निर्माण गरिएको हो ।
चितवनको भरतपुरदेखि मनाङको धारापानीसम्मको डबल सर्किट प्रसारण लाइनको लम्बाइ करिब ११३ किलोमिटर छ । आयोजनालाई तीन प्याकेजमा विभाजन गरी काम भइरहेको छ । पहिलो प्याकेजअन्तर्गत उदीपुरबाट नयाँ भरतपुर सबस्टेसनसम्मको करिब ६७ किलोमिटर प्रसारण लाइन निर्माण भइरहेको छ । दोस्रो प्याकेजअन्तर्गत नयाँ भरतपुर र उदीपुर सबस्टेसन निर्माणाधीन छन् ।
तेस्रो प्याकेजअन्तर्गत खुदीबाट धारापानीसम्मको ४६ किलोमिटर प्रसारण लाइन र दुई वटा सबस्टेसन निर्माण भइरहेको छ । नेपाल सरकारको लगानी र युरोपेली लगानी बैक (इआइबी)को सहुलितपूर्ण ऋणमा निर्माणाधीन आयोजनाको अनुमानित लागत करिब १६ अर्ब रुपैयाँ छ । प्रसारण लाइन पू्रा भएपछि करिब १६०० मेगावाट विद्युत प्रवाह गर्न सकिनेछ ।
