ऊर्जा खबर
काठमाडौं । लामो समयदेखि विद्युत् महसुल नतिरेका ग्राहकको लाइन काट्न जाँदा नेपाल विद्युत् प्राधिकरणका कर्मचारीमाथि हातपात भएको छ । भक्तपुर सिरुटारका ग्राहक रघु केसीले प्राधिकरणका कर्मचारी कृष्णबहादुर सुवाल, गोविन्द श्रेष्ठ र बाबा ढकालमाथि हातपात गरेका हुन् ।
०१४.१८०३५‘ए’ नम्बरका ग्राहक केसीले सुवालको कठालो समातेको, लछारपछार पारेको र दुर्व्यवहार गरेको ठिमी वितरण केन्द्रका मिटर रिडिङ सुपरभाइजर प्रमोद खड्काले ऊर्जा खबरलाई जानकारी दिए । उनका अनुसार निज केसीको ३१ महिनाको करिब १९ हजार रुपैयाँ महसुल बक्यौता थियो ।
प्राधिकरण चुहावट नियन्त्रण नियमावली अनुसार निरन्तर ६० दिनसम्म महसुल नतिरे त्यस्तो ग्राहकलाई कालोसूचीमा राखेर लाइन काटिनेछ । तर, प्राधिकरणले भने महिनौंसम्म ग्राहकलाई सहुलियत दिएको देखिन्छ । लामो समय महसुल नतिरेको हुँदा कार्यालयले ‘लाइन काट्नू’ भन्ने निर्देशन दिएकोले कर्मचारी पुगेका थिए ।
कर्मचारीहरूले जसरी पजि लाइन काट्नैपर्ने भन्दै अडान लिएर अगाडि बढ्दा हातपात तथा दुव्र्यहार भएको खड्काले बताए । लामो समय किन महसुल उठाउने काम भएन भन्ने प्रश्नको जवाफमा केन्द्रका सहायक प्रबन्धक सुबोध शर्माले भने, ‘६–७ महिना कोभिडका कारण कर्मचारी मिटर रिडिङ गर्न गएनन् । केही महिना त छुटेकै हो ।’
निज केसीबाट उठाउनुपर्ने रकम तथा अवधिका विषयमा भने शर्मा र खड्काले फरक फरक जानकारी दिए । सहायक प्रबन्धक शर्माले केसीबाट २३ महिनाको २२ हजार रुपैयाँ उठाउन बाँकी रहेको जानकारी दिएका छन् । उता खड्काको भनाइ अनुसार निजबाट ३१ महिनाको १९ हजार रुपैयाँ असुलउपर गर्नुपर्नेछ ।
उठाउनुपर्ने रकमबारे यकिन नहुनु वा एकरूपता नहुनु, महिनौंसम्म बक्यौता रहनुले यसमा प्राधिकरणको पनि त्रुटी देखिन्छ । हरेक महिना वा २¬–३ महिनामा निरन्तर बिलिङ गरेर बक्यौता उठाएको भए ग्राहक आक्रोसित हुनुपर्ने अवस्था आउँदैनथ्यो ।
हातपातपछि केसीले केन्द्रको कार्यालयमा आएर महसुल बुझाएको तर उनको घरमा लाइन नजोडिएको शर्माले बताए । ‘हाम्रा कर्मचारीमाथि हातपात भएको हुँदा ग्राहकले महसुल तिरे पनि लाइन जोडेका छैनौं, निज केसीलाई कारबाहीको प्रक्रिया अगाडि बढाइएको छ ।
दुर्व्यवहार खेपेका कर्मचारीहरूले केसी विरुद्ध कारबाहीको माग गर्दै जिल्ला प्रशासन कार्यालय भक्तपुरमा निवेदन दिएको खड्काले बताए । उनका अनुसार अहिले केसीको घर तथा घटनास्थलमा प्रहरी पुगेको छ ।
