दिलसा भण्डारी
काठमाडौँ । बाढीपहिरोले क्षतिग्रस्त मान्डु जलविद्युत् केन्द्रबाट विद्युत् उत्पादन सुचारु गर्न अझै ६ महिना लाग्ने भएको छ । २०७५ सालदेखि २२ मेगावाट विद्युत् उत्पादन गर्दै आएको यस जलविद्युत् केन्द्रको उत्पादन गत असोज ११ र १२ गते आएको भिषण बाढीपहिरोले संरचनामा क्षति पुर्याएपछि विद्युत् उत्पादन बन्द भएको हो । मकवानपुरको भीमफेदी गाँउपालिका–८ इपा, दोभानस्थित बागमती नदीको पानीबाट उक्त जलविद्युत् केन्द्र सञ्चालन हुँदै आएको थियो ।
बाढीले आयोजनाको विद्युत् गृह पूर्णरूपमा डुबेको, बाँध संरचना, हेडरेस टनेल लगायतका थुप्रै संरचनाहरूमा क्षति पुर्याएकोले सञ्चालनमा ल्याउन बढी समय लागेको आयोजनाको प्रवर्द्धक माण्डु हाइड्रोपावर लिमिटेडका वित्तीय अधिकृत सबल प्रधानले ऊर्जा खबरसँग बताए ।
‘बाढीले पावरहाउस डुबेकाले अझै पनि लेदोलगायत फोहर अझै पूर्णरूपमा सफा गरिसकिएको छैन,’ उनले भने, ‘संरचनाहरूमा बढी क्षति भएकाले सफा गरेर निर्माण गरी सञ्चालनमा ल्याउन समय लाग्ने छ ।’
कुल ४ अर्ब १ करोड ९४ लाख ३७ हजार २५८ लगानीमा निर्माण पूरा गरी सञ्चालनमा आएको केही वर्षपछि नै आयोजनाले ठूलो आर्थिक क्षति ब्यहोरेको हो । आयाेजनालाई करिब १ अर्ब रुपैयाँ बराबरकाे क्षति भएकाे अनुमान गरिएकाे छ । यद्यपि, हालसम्म आर्थिक क्षतिको यकिन विवरण भने आइनसकेको प्रधानले बताए ।
.jpg)