ऊर्जा खबर
काठमाडौं । संखुवासभाको हेवा खोलामा पहिचान भएको ५ मेगावाटको सुपर हेवा खोला जलविद्युत आयोजनाको क्षमता विस्तार गरेर ६ मेगावाटमा निर्माण गरिने भएको छ । सुपर हेवा खोला हाइड्रोपावर कम्पनीले जिल्लाको जलजले र सिद्धपोखरीमा पहिचान गरि अघि बढाएको आयोजनाको क्षमता बढाइएको हो ।
डिजाइनमा सामान्य परिवर्तन भएपछि एक मेगावाट क्षमता थपिएको कम्पनीका निर्देशक विरेन्द्र केसीले बताए । उनका अनुसार आयोजनाको बाँध प्रस्तावित भन्दा अलि माथि सारिएको छ ।
अहिले आयोजनाको सिभिल संरचनाको काम सुरु हुनु अघिको काम भइरहेको छ,’ उनले ऊर्जाखबरसँग भने, ‘आयोजनास्थलसम्म पुग्ने पहुँचमार्ग बनाउने काम भइरहेको छ ।’ जग्गा किन्ने काम, ठेक्का सम्झौता सम्पन्न भएको छ ।
२०७५ चैत्र २६ गते विद्युत विकास विभागबाट उत्पादन अनुमति पाएपनि विभिन्न कारणले गर्दा सिभिल संरचनाको काम सुरु गर्न नसकिएको कम्पनीले जनाएका छ । गत वर्षनै सिभिल संरचना निर्माण सुरु हुनु अघिको काम सम्पन्न गरेर आयोजनाको काम सुरु गर्नुपर्ने भएपनि विश्वव्यापी रुपमा फैलिएको कोरोना महामारी, निषेधाज्ञाका कारण काम प्रभावित भएको केसीले बताए ।
क्षमता विस्तार हुनु अघि आयोजना निर्माण गर्न १ अर्ब रुपैयाँ लागत अनुमान गरिएको थियो, तर क्षमता बढेपछि लागत पनि बढ्नेछ । आयोजनामा वाणिज्य बैंक र मेगा बैंकले ७० करोड रुपैयाँ ऋण लगानी गरेका छन् । बाँकी स्वपुँजी लगानी रहनेछ ।
आयोजना सम्पन्न भएपछि उत्पादीत विद्युत १२ किलोमिटर दुरीमा रहेको बानेश्वर सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
यो आयोजनासँगै यही खोलामा ८.५ मेगावाटको माथिल्लो हेवा, ७.३ मेगावाटको लोअर हेवा ‘ए’ जलविद्युत आयोजना निर्माणाधीन छन् । माथिल्लो हेवाको काम अन्तिम चरणमा पुगेको छ । जिल्लाकै हेवा खोलामा ४.९९ मेगावाटको हेवा खोला स्मलले विद्युत उत्पादन गरिरहेको छ ।
