ऊर्जा खबर
काठमाडौं । वैकल्पिक ऊर्जा प्रवर्द्धन केन्द्रको १० किलोवाट भन्दा बढी क्षमताका ७६ लघुजलविद्युत योजना रुग्ण रहेका छन् । सञ्चालनमा रहेका लघुजलविद्युत योजना कार्यसम्पादन अवस्थाको अध्ययन गर्दा उक्त योजना रुग्ण पाइएको हो ।
सञ्चालनमा रहेका १० किलोवाट भन्दा बढीका ९८९ लघुजलविद्युत मध्ये ७६ योजना रुग्ण भेटिएको महालेखा परिक्षकको ५९औं वार्षिक प्रतिवेदनमा उल्लेख छ । यस्तै, १० किलोवाट भन्दा साना क्षमताका ८९१ लघु जलविद्युत योजनाको अध्ययन नभएकोले सञ्चालनको अवस्था यकिन गर्न नसकिएको पनि प्रतिवेदनमा उल्लेख छ ।
केन्द्रको १८८० लघुजलविद्युत योजना जडान भएका छन् । केन्द्रले सञ्चालन गरिरहेको जडित योजनाहरूको अधिकतम उत्पादन गरी उच्च क्षमतामा उपयोग गर्ने गरी दिगो रुपमा सञ्चालन गर्नुपर्ने महालेखा परिक्षकको भनाई छ । महालेखा परिक्षकका अनुसार ले जडान योजनाको सञ्चालन अवस्थाको निरनतर अध्ययन गर्नुका साथै मर्मत संभार कोषको व्यवस्था गरी नियमित मर्मत संभार गर्नुपर्ने छ ।
केन्द्रले दुर्गम क्षेत्रमा वैकल्पिक ऊर्जाबाट विद्युतीकरण गर्न सो लघु जलविद्युत योजना निर्माण गरी सञ्चालनमा ल्याएको हो । राष्ट्रिय प्रसारण प्रणालीको पहुँच नपुगेको क्षेत्रमा केन्द्रले लघुजलविद्युत, हाइब्रिड सोलार, वायु ऊर्जाबाट विद्युत सेवा दिइरहेको छ । केन्द्रले हालसम्म करिब ७५ मेगावाट विद्युत उत्पादन गरिसकेको छ ।
