ऊर्जा खबर
.jpg)
काठमाडौं । राप्ती हाइड्रो एण्ड जनरल कस्ट्रक्सन कम्पनीले साढे २९ लाख कित्ता सेयर निष्कासन अनुमति पाएको छ । नेपाल धितोपत्र बोर्डले रुकुमको सिस्नेमा निर्माणाधीन ५ मेगावाटको रुकुमगाड जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन अनुमति दिएको हो ।
सय रुपैयाँमा अंकित २९ करोड ४१ लख ४१ हजार रुपैयाँ बराबरको २९ लाख ४१ हजार ४ सय १० कित्ता सेयर निष्कासन अनुमति पाएको कम्पनीले जनाएको छ । कम्पनीका अनुसार अब पहिलो चरणमा आयोजना प्रभावित स्थानीय र दोस्रो चरणमा सर्वसाधारणका लागि छुट्याएको सेयर निष्कासन गरी बाँडफाँड गरिनेछ ।
कम्पनीको सेयर निष्कासन गरी बाँडफाँड गर्न मुक्तीनाथ क्यापिटललाई बिक्री प्रबन्धक तोकेको छ । कम्पनीले निर्माण गरिरहेको आयोजनाको काम अन्तिम चरणमा पुगेको छ । आयोजनाले आगामी असोजदेखि विद्युत उत्पादन सुरु गर्ने कम्पनीले जनाएको छ ।
उत्पादीत विद्युत २१ किलोमिटर दुरीमा रहेको नेपाल विद्युत प्राधिकरणको मुसीकोट सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनीले आफैले निर्माण गर्दैछ ।
आयोजना सम्पन्न गर्न १ अर्ब रुपैयाँ लागत अनुमान गरिएको छ । आयोजनामा प्राइमको अगुवाईमा सेन्चुरी र कुमारी बैंकले ७० प्रतिशत ऋण लगानी गरेका छन् । बाँकी स्वपुँजी छ ।
