ऊर्जा खबर
काठमाडौं । सरकारले ऊर्जा, जलस्रोत तथा सिँचाइ मन्त्रालयको ऊर्जातर्फको जिम्मेवारी आज (जेठ ११ गते) देखि सुशीलचन्द्र तिवारीलाई ताेकेकाे छ । राष्ट्रिय सतर्कता केन्द्रबाट सरुवा गरी उनलाई उक्त जिम्मेवारी तोकिएको हो ।
५ वर्षे सचिवको कार्यकाल पूरा गरी देवेन्द्र कार्कीले अनिवार्य अवकास पाएपछि मन्त्रिपरिषद्को जेठ १० गतेको निर्णयले त्यस ठाउँको जिम्मेवारीमा तिवारीलाई पठाएको छ । कार्कीले जेठ ३ गते अनिवार्य अवकास पाएका थिए ।
करिब ११ महिना अगाडि सचिवमा बढुवा भएका तिवारीले १० वर्ष सहसचिवको रूपमा मन्त्रालयका विभिन्न महाशाखा तथा विभागमा रहेर जिम्मेवारी पूरा गरिसकेका छन् । सचिवमा बढुवा हुनासाथ उनलाई तत्कालीन राष्ट्रिय पुनर्निर्माण प्राधिकरणको जिम्मेवारी तोकिएको थियो । प्राधिकरणको समयावधि सकिएपछि उनी केन्द्रमा सरुवा भएका थिए ।
तिवारी करिब ४ महिना जलस्रोत तथा सिँचाइ विभागको महानिर्देशकको जिम्मेवारी सम्हालेपछि मन्त्रालयमा सरुवा भएर आएका थिए । २०५१ सालबाट सरकारी सेवामा प्रवेश गरेका तिवारीले करिब २८ वर्ष योगदान पुर्याइसकेका छन् ।
