ऊर्जा खबर
काठमाडौं । सिराहा जिल्लाको लाहान नगरपालिका १५ ढोढना सिमलटोकीमा ट्रान्सफर्मर जडान गरेको ३ वर्षपछि सञ्चालनमा आएको छ । स्थानीयकाे सामाजिक विवादका कारण सञ्चालनमा आउन नसकेको १०० केभी ट्रान्सर्फमर १५ गते (शुक्रबार) चार्ज भएकाे हो ।
सिमलटोकीमा गाउँबस्ती ठुला भएका कारण एक ट्रान्सर्फमरले लोड धान्न नसकेपछि थप १०० केभीको ट्रान्सफर्मर जडान गरिएकाे थियाे । ट्रान्सफर्मर जडान गर्दा गाउँमा जग्गा मिचेको लगायका कारण देखाँउदै स्थानीयले अवराेध गरेपछि सञ्चालन गर्न नसकिएकाे नेपाल विद्युत प्राधिकरण लाहान वितरण केन्द्रले जनाएको छ ।
स्थानीयले अवराेध गरेपछि विगत ३ वर्षदेखि ट्रान्सफर्मर जडान मात्र गरेर छाडिएकाे प्राधिकरणले जनाएकाे छ । हालसालै वडा कार्यालयले विवाद मिलाएपछि ट्रान्सफर्मर सञ्चालन गरेको छ ।
