कालीगण्डकी गाउँपालिकाले साढे ४ हजार घरधुरीमा इन्डक्सन चुलो वितरण गर्ने

काठमाडौं । स्याङ्जाको कालीगण्डकी गाउँपालिकाले प्रत्येक घरधुरीमा इन्डक्सन चुलाे वितरण गर्ने भएको छ । पालिकाले ग्यास चुलो प्रतिस्थापन गर्दै पालिकाभित्र बसोवास गर्ने साढे ४ हजार घरधुरीमा इन्डक्सन चुलो वितरण गर्ने योजना अगाडि सारेको हो ।

गाउँपालिकाका अध्यक्ष र उपाध्यक्षले पदभार ग्रहण गर्दै ग्यासको बढ्दो मूल्यवृद्धिलाई मध्यनजर गर्दै पालिकाभित्रका करिब ४ हजार ६ सय घरधुरीमा विद्युतीय इन्डक्सन चुलो वितरण गर्ने पहिलो निर्णय गरेका छन् ।

‘घर–घरमा रहेका ग्यासका सिलिन्डर लिने र इन्डक्सन चुलाे दिने निर्णय गरेका छौँ’, अध्यक्ष खिमबहादुर थापाले भने, ‘यसलाई आउँदो गाउँ सभाबाट पारित गरेर लागू गरिनेछ ।’

कालीगण्डकीलाई धुँवारहित पालिका बनाउने लक्ष्यका साथ अगाडि बढेको उल्लेख गर्दै थापाले विद्युतको प्रयोगमा जोड दिइएको बताए । यसअघि वडा नम्बर ५ को दलित समुदायमा इन्डक्सन चुलाे परीक्षणका रूपमा वितरण गरिएको थियो । त्यो कार्यक्रम प्रभावकारी भएसँगै यस पटक पूरै गाउँपालिकाभरि नै इन्डक्सन चुलाे वितरण गर्ने योजना अगाडि सारिएको थापाले बताए ।

गाउँपालिकाले विद्युतको पहुँच सबै घरधुरीमा पुर्याउन न्यूनतम विद्युतीय महसुल भुक्तानी गर्दै आएको छ । यसअघि पनि गाउँपालिकाले न्यूनतम २० युनिटसम्म विद्युत महसुल निशुल्क गरेको थियो ।