ऊर्जा खबर
काठमाडौं । अख्तियार दुरुपयोग अनुसन्धान आयोगले नेपाल विद्युत प्राधिकरणमा कार्यरत कृष्ण आलेविरुद्ध भ्रष्टाचार मुद्दा दायर गरेको छ । आयोगले घुस लिएको अभियोगमा पक्राउ परेका आलेविरुद्ध विशेष अदालत काठमाडौंमा सोमबार मुद्दा दायर गराएको हो ।
आलेले भ्रष्टाचार निवारण ऐन, २०५९ को दफा (३) को उपदफा (१) बमोजिम गैरकानुनीरूपमा सेवाग्राहीबाट घुस लिएको पुष्टि भएपछि कानुनी कारबाहीको प्रक्रिया अघि बढाउन अदालतमा मुद्दा दायर गरिएको आयोगले जनाएको छ । उनी प्राधिकरण प्राधिकरण तनहुँ वितरण केन्द्र, आँबु शाखामा कार्यरत कर्मचारी हुन् ।
अख्तियारले विद्युतीय पोल तथा तार मर्मत गरेवापत नियमानुसार लाग्ने शुल्क बाहेक अतिरिक्त रकम घुस लिइरहेको अवस्थामा उनलाई पक्राउ गरेको थियो । उनी प्राधिकरणमा कार्यरत ४ तहका कर्मचारी हुन् । आयोगले अदालतसमक्ष भ्रष्टाचार निवारण ऐन, २०५९ को दफा ३ को उपदफा (१) को देहाय (क) बमोजिम जरिवाना र कैद सजायको मागदाबी गरेको छ ।
आयोगले गैरकानुनीरूपमा सेवाग्राहीबाट ५ हजार रुपैयाँ घुस लिइरहेको अवस्थामा आलेलाई पक्राउ गरेको थियो । उनलाई अख्तियारको पोखरा कार्यालयबाट खटिएको अनुसन्धान टोलीले घुस लिइरहेको अवस्थामा पक्राउ गरेको थियो ।
