ऊर्जा खबर
काठमाडौं । नेपाल विद्युत प्राधिकरणले लामो सयमसम्म विद्युत महसुल नबुझाउने १ हजार ३ सय १० ग्राहकको लाइन काटेको छ । प्राधिकरण विरगन्ज वितरण केन्द्रले महसुल नतिर्ने ग्राहकको लाइन काटी कारबाही गरेको हो ।
८ महिनाको अवधिमा यी ग्राहकको लाइन काटी करिब ११ करोड ५६ लाख २८ हजार ९ सय ९९ रुपैयाँ विद्युत महसुल बक्यौता असुल गरेको केन्द्रले जनाएको छ । केन्द्रका अनुसार यी ग्राहकबाट १२ करोड ९९ लाख ७ सय ८२ रुपैयाँ असुल गर्न बाँकी थियो ।
महसुल बुझाउने ग्राहकको लाइन पुन जोडिएको छ । बाँकी ग्राहकले पनि जरीवानासहितको बक्यौता बुझाएपछि लाइन पुनःजोडिनेछ ।
यो अवधिमा हुकिङ गरेर विद्युत चोरी गर्ने ६३ जना ग्राहक पनि कारबाहीमा परेका छन् । कारबारीमा परेका उनीहरुबाट २९ करोड ३४ लाख ६ सय ७५ रुपैयाँ असुल गरिएको छ ।
१६ जना कालो सूचीका ग्राहकलाई समेत कारबाही गरिएको छ । बारम्बार ताकेता गर्दा र लामो सयमसम्म महसुल तिर्न नआउने ग्राहकको नाम कालो सूचीमा राखेर कारबाही गरिएको केन्द्रले जनाएको छ । कालो सूचीका ग्राहकबाट ८ लाख ८३ हजार १ सय ७ रुपैयाँ असुल भएको छ ।
