ऊर्जा खबर
काठमाडौँ । देशकै लोकप्रिय डिमार्टमेन्टल स्टोर 'भाटभटेनी सुपरमार्केट एण्ड डिपार्टमेन्टल स्टोर'ले आफ्ना देशभरका भवनको छतछतमा सौर्य विद्युत् उत्पादन गर्ने योजना अगाडि बढाएको छ । यसका लागि सुपरमार्केट र रिन्यु होल्डिङ्स प्रालि बिच सम्झौता समेत गरिएको छ ।
भाटभटेनीका विभिन्न सुपर मार्केटहरूको छत तथा खाली स्थानहरू उपयोग गरेर जम्मा १२.७५० मेगावाट बराबरको सौर्य विद्युत् उत्पादन तथा सहकार्य गर्न रिन्यु होल्डिङ्ससँग सम्झौता भएको जनाइएको छ । समझौतापत्रमा भाटभटेनीको तर्फबाट सञ्चालक सावित्री गुरुङ र रिन्यु होल्डिङ्सका तर्फबाट प्रबन्ध निर्देशक किरणकुमार श्रेष्ठले हस्ताक्षर गरेका छन् ।
रिन्यु होल्डिङ्सले सोलर, हाइड्रो लगायतका नेपालको नवीकरणीय ऊर्जाका साथै चार्जिङ् स्टेसन र नवीकरणीय ऊर्जा सम्बन्धी नवीनतम प्रविधिमा काम गर्दै आएको छ । उता, भाटभटेनीले देशभर २७ वटा सुपरमार्केटको स्थापना गरी सञ्चालनमा ल्याएको छ भने अबको ५ वर्षभित्र थप ५१ वटा विस्तार गर्ने लक्ष्य रहेको जनाएको छ ।
ती सबै संरचनामा नवीकरणीय ऊर्जा अर्थात् सौर्य विद्युत् जडानलाई प्राथमिकता दिइने पनि भाटभटेनीले जानकारी दिएको छ । यस सम्झौताले नेपालमा नवीकरणीय ऊर्जा क्षेत्रको प्रवर्द्धन र दिगो विकासमा महत्त्वपूर्ण भूमिका खेल्ने अपेक्षा गरिएको छ । साथै, कार्बन उत्सर्जन न्यूनीकरणमा समेत विशेष भूमिका खेल्न सक्नेछ । रिन्यु होल्डिङ्स तथा भाटभटेनी सुपरमार्केट आगामी दिनमा समेत आपसी सहकार्यमा सरकारको ऊर्जा विकासको लक्ष्यमा योगदान पुर्याउने गरी काम गर्ने प्रतिबद्धता जनाएका छन् ।
.jpg)
