ऊर्जा खबर
काठमाडौं । नेपाल विद्युत प्राधिकरणले सञ्चालनमा रहेको ६६ केभी हेटौंडा–परवानीपुर डबल सर्किट प्रसारण लाइनको स्तरोन्नति सुरु गरेको छ । प्राधिकरणले बुधबारदेखि प्रसारण लाइनको स्तरोन्नतिको काम सुरु गरेको हो ।
प्रसारण लाइनको स्तरोन्नतिका क्रममा टावर नम्बर २९७ देखि ३०२ सम्म ३ वटा नयाँ टावर थपिने प्राधिकरणले जानकारी दिएको छ । प्राधिकरणका अनुसार प्रसारण लाइनको स्तरोन्नति गर्न कन्डक्टर बदलीको काम पनि सुरु गरिएको छ ।
बुधबारबाट सुरु भएको प्रसारण लाइनको स्तरोन्नतिको काम आगामी मंसिर १३ गतेसम्ममा सम्पन्न गरिसक्ने तालिका रहेको प्राधिकरण प्रसारण निर्देशनालय अन्तर्गतको ग्रिड विकास विभागले जनाएको छ । प्रसारण लाइनको ३ वटा टावर थप गर्ने तथा कन्डक्टर बदली गरिने समयमा दैनिक २ घन्टाका दरले विभिन्न सर्किटबाट हुने विद्युत आपूर्ति बन्द हुने भएको छ ।
स्तरोन्नति हुने अवधिभर प्रसारण लाइनबाट विद्युत प्रवाह हुने क्षेत्रको सेवा प्रभावित हुने प्राधिकरणले जनाएको छ । हेटौंडा देखि परवानीपुरसम्मको औद्योगिक क्षेत्रको सेवा पनि प्रभावित हुने देखिएको छ ।
प्रसारण लाइनको स्तरोन्नतिको काम सकिएपछि मंसिर १४ गतेबाट नियमितरूपमा सञ्चालन गर्ने जानकारी प्राधिकरणले दिएको छ । औद्योगिक तथा घरायसी ग्राहकलाई गुणस्तरीय विद्युत सेवा दिन प्रसारण लाइनको स्तरोन्नति सुरु गरिएको हो । सरकार र प्राधिकरणको संयुक्त लगानीमा यो प्रसारण लाइन निर्माण गरिएकाे हाे ।
