ऊर्जा खबर
काठमाडौं । नेपाल विद्युत प्राधिकरणले १३२/३३/११ केभी नवलपुर सबस्टेसन लोडमा चार्ज गरेको छ । सर्लाही जिल्लाको विद्युत आपूर्तिको गुणस्तर सुधार तथा स्तरोन्नति गर्ने उद्देश्यले नवलपुरमा निर्माण भएको सबस्टेसन शनिबारदेखि लोडमा चार्ज गरिएकाे हाे ।
अहिले लोड दिएर सबस्टेसन चार्ज गरिएको आयोजनाका इन्जिनियर सुशान्त ठाकुरले बताए । उनका अनुसार सबस्टेसन चार्ज भएपछि जिल्लाको विद्युतीकरणमा सुधार आएको छ । सबस्टेसन गत बुधबार ‘नो’ लोडमा चार्ज गरिएको थियो ।
सबस्टेसन सञ्चालनमा आएपछि उद्योग र घरायसी ग्राहकले पाउने विद्युत सेवाको गुणस्तर सुधार तथा प्रणालीको स्तरोन्नति भएको प्राधिकरण मलंगवा वितरण केन्द्रका इन्जिनियर अरुण कुमार यादवले बताए । उनका अनुसार अब जिल्लाका उद्योगलाई मागे जति विद्युत दिन सहज भएको छ । घरायसी ग्राहकले उपयोग गर्ने विद्युतको गुणस्तरमा पनि सुधार भएको छ ।
केन्द्र अन्तर्गतक करिब ४७ हजार ग्राहक छन् । जिल्लाको पहाडी क्षेत्रमा पनि लाइन तान्ने काम सकिएको छ, अब छिट्टै सेवा सुरु गरिने पनि यादवले बताए ।
१३२/३३ केभी सबस्टेसनमा ६३ एमभिएको पावर ट्रान्सफर्मर जडान गरिएको छ । ३३/११ केभी सबस्टेसनमा १६ एमभिएको पावर ट्रान्सफर्मर जडान गरिएको छ ।
१३२/३३ केभी सबस्टेसनबाट जिल्लाको हरिपुर र मलंगवा सबस्टेसनमा विद्युत आपूर्ति हुनेछ । जिल्लाकै लालबन्दी र हरिवनमा नवलपुर सबस्टेसनबाट जाने ११ केभी फिडरबाट विद्युत आपूर्ति गर्ने व्यवस्था मिलाइएको छ ।
कोरोना (कोभिड–१९) महामारीको संकटका बाबजुत पनि नियमित काम गरेर सबस्टेसन सम्पन्न गरी सञ्चालनमा ल्याएको बताए । आर्थिक वर्ष २०७५/७६ देखि सबस्टेसन निर्माणको काम सुरु भएको थियो ।
सबस्टेसन निर्माण सम्पन्न गर्न करिब ४० करोड रुपैयाँ खर्च भएको उनले जानकारी दिए । सबस्टेसन निर्माणको काम भारतको पावर टेक र नेपालको वाइवा कन्स्ट्रक्सनले संयुक्तरूपमा गरेका हुन् ।
