बंगलादेशसँग छिट्टै विद्युत व्यापार सम्झौता हुन्छः मन्त्री बस्नेत

काठमाडौं । ऊर्जा, जलस्रोत तथा सिँचाइ मन्त्री शक्तिबहादुर बस्नेतले बंगलादेशसँग विद्युत् व्यापार सम्झौता छिट्टै हुने बताएका छन् । नयाँ भरतपुर २२०/१३२ किलोभोल्ट (केभी) सबस्टेसन र हेटौंडा–भरतपुर–बर्दघाट २२० केभी डबल सर्किट प्रसारण लाइनको उद्घाटन कार्यक्रममा सहभागी हुन भरतपुरमा पुगेका उनले यस्तो बताएका हुन् ।

औपचारिकता दिनुपर्ने केही काम अन्तिम चरणमा पुगेकोले यसैवर्ष सम्झौतासम्बन्धी औपचारिक रुपमा घोषणा गरीने मन्त्री बस्नेतले बताए । ‘सुख्खा र वर्षा दुवै समयमा नेपाल विद्युतमा आत्मनिर्भर हुन लागेको छ,’ उनले भने, ‘हामी पूर्णरुपमा आत्मनिर्भर बन्दैछौँ, यससँगै सबै समस्याको समाधान हुन्छ ।’

उत्पादन वृद्धि गरेर वितरण प्रणालीलाई व्यवस्थित गर्ने काम हाल भइरहेको उनले जानकारी दिए । ५० प्रतिशत क्षेत्रमा मात्रै भएको विद्युतीकरणलाई बढाएर ९८ प्रतिशत क्षेत्रमा पुर्याएको भन्दै उनले हाल देखिएका समस्या छिट्टै समाधान हुने बताए ।

अबको सुख्खा सिजनमा अहिले देखिएका समस्या समाधान भएर जाने, सरकारले एकीकृत योजनाका साथ ऊर्जा क्षेत्रको उत्पादन, प्रसारण र वितरण प्रणालीलाई व्यवस्थित गर्ने काम गइरहेको पनि बस्नेतले बताए ।