चार्जिङ स्टेसन निर्माण गर्न इच्छुक निजी तथा सार्वजनिक संस्थासँग आवेदन माग

काठमाडौं । नेपाल विद्युत प्राधिकरणले सार्वजनिक स्थानमा विद्युतीय सवारी चार्ज गर्ने चार्जिङ स्टेसन निर्माण गर्न इच्छुक निजी तथा सार्वजनिक संस्थासँग आवेदन मागेको छ । प्राधिकरण आयोजना व्यवस्थापन निर्देशनालयले विद्युतीय सवारी प्रवर्द्धन गर्ने उद्देश्यले देशका विभिन्न स्थानमा चार्जिङ स्टेसन निर्माण गरी सञ्चालन गर्न निजी तथा सार्वजनिक संस्थासँग आवेदन मागेको हो ।

निर्देशनालयले सार्वजनिक प्रयोजनका लागि चार्जिङ स्टेसन सञ्चालन गर्न इच्छुक निजी तथा सार्वजनिक संस्थालाई सम्पर्कमा आउन आग्रह गरेको छ । सरकारले निजी संस्थासँग मिलेर विद्युतीय सवारी प्रवद्र्धन गर्ने उद्देश्यले देशभरमा ५ सय चार्जिङ स्टेसन निर्माण गर्ने लक्ष्य निर्धारण गरेकाले सोही लक्ष्य पूरा गर्नका लागि इच्छुकहरूबाट आवेदन मागिएको प्राधिकरणले जनाएको छ ।

सरकारी लक्ष्य पूरा गर्न निजी क्षेत्रसँग मिलेर देशभरमा राजमार्ग, बसपार्क, सपिङ मल, सिनेमा हल, शिक्षण स.स्था, अस्पताल, होटल, रेष्टुरेन्टलगायतका सार्वजनिक स्थलमा चार्जिङ स्टेसन निर्माण गर्ने प्राधिकरणको योजना छ । प्राधिकरणले यही योजनाअनुसार ठाउँ–ठाउँमा चार्जिङ स्टेसन राख्न इच्छुकहरूलाई लगानीका लागि आह्वान गरेको हो ।

प्राधिकरणले व्यापारिक प्रयोजनका लागि भर्खरै देशभरमा ५० वटा चार्जिङ स्टेसनको निर्माण सुरु गरेको छ । विद्युतीय सवारी साधन प्रवद्र्धन गर्ने उद्देश्यले प्रस्ताव गरिएका चार्जिङ स्टेसन निर्माणको काम अघि बढाएको हो । ५० वटै चार्जिङ स्टेसनको निर्माण सम्पन्न गरी सञ्चालनमा ल्याउन ३७ करोड ७९ लाख ५५ हजार रुपैयाँमा ठेक्का सम्झौता भएको हो ।