दिनेश सिवाकाेटी
श्रीमान्, कार्यकारी निर्देशकज्यू
नेपाल विद्युत प्राधिकरण, रत्नपार्क ।
कोरोना महामारी (कोभिड–१९) को समयमा गरिएको लकडाउनमा समेत ज्यानको प्रवाह नगरी कार्यक्षेत्र (फिल्ड) मा खटिएका इन्जिनियरिङ सेवा निर्देशनालयका श्रमिकहरू ‘कोरोना जोखिम भत्ता’बाट बञ्चित हुन पुगेका छन् । हामीले विकट जिल्लामा खोलाको किनारमा पाल टाँगेर सुतेर पनि कार्यालयले तोकेको जिम्मेवारी पूरा गरेका छौं । ती श्रमिकहरूले विगत एक वर्षदेखि तत्कालीन इन्जिनियरिङ सेवा निर्देशनालयका उपकार्यकारी निर्देशक मनोज सिलवाल सरले भुक्तानी आदेश दिँदा समेत पुरानो भत्तम पाएका छैनन् ।
अझ चालू आर्थिक वर्षको श्रावण महिनाको इपिआर समेत उपलब्ध हुन सकेन । अन्यायमा परेका श्रमिकहरू २१० मेगावाटको चैनपुर सेतीको सर्ज साफ्टको ड्रिलिङको काम बन्द गरी न्याय खोज्न सर्वोच्च अदालतमा आवेदन दिन काठमाडौं फर्किने तयारीमा छन् । स्मरण रहोस्, उज्यालो नेपालका नायक अर्थात् हाम्रा कार्यकारी निर्देशकज्यूले २० अर्ब रुपैयाँ नाफा कमाउने लक्ष्य यसरी
नै श्रमिकको श्रम शोषण गरेर पूरा हुने हो ? लेखा प्रमुख कलाधर गौतम र पे–रोल बनाउने लेखा सहायक एवं कर्मचारी संघका उपमहासचिव पुष्प भट्टराईको गैरजिम्मेवारपूर्ण कदमले प्राविधिकहरूको एक वर्षको भत्ता रोकिएको छ । यसरी श्रम शोषण भइरहँदा पनि उच्च व्यवस्थापनको ध्यानाकर्षण किन हुँदैन ?
आदरणीय कार्यकारी निर्देशकज्यूमा अनुरोध छ कि, बझाङलगायत देशैका विभिन्न आयोजनामा कार्यरत श्रमिकहरूको तर्फबाट एक वर्षदेखिको इपिआर भत्ता र कोरोना संक्रमणका बखत लकडाउनको अवधिमा कार्यरत इन्जिनियरिङ निर्देशनालयका श्रमिकहरूले पाउने भत्ता उपलब्ध गराइयोस् । श्रमिकको भत्ता रोक्न वा रोक्न लगाउने विषय छानबिन गरी दोषीलाई जिम्मेवारीबाट मुक्त गरियोस् । र, रोकिएको इपिआर भत्ता र कोरोना संक्रमणकालको जोखिम भत्ता उपलब्ध गराई श्रमिकहरूको गिरेको मनोबल उच्च बनाई अनवरत सेवा गर्ने वातावरण मिलाइदिनुहुन हार्दिक अनुरोक गर्दछु ।
दिनेश शिवाकोटी
सहायक इन्जिनियर (सिभिल)
इन्जिनियरिङ सेवा निर्देशनालय
हाल : चैनपुर सेती, बझाङ
