ऊर्जा खबर
काठमाडौं । नेपाल विद्युत प्राधिरणले लामो समयसम्म विद्युत महसुल तिर्न अटेर गरेका करिब ३ हजार ग्राहकको लाइन काटेको छ । प्राधिकरण इलाम वितरण केन्द्रले आर्थिक वर्ष २०७८/७९ मा महसुल नतिर्ने ग्राहकको लाइन काटेर कारबाही गरेको हो ।
महसुल नतिरेका ३ हजार ३ सय ९७ जना ग्राहकको लाइन काटिएको केन्द्रका लेखा प्रमुख कमल प्रसाद रिजालले बताए । ‘यी ग्राहकबाट १ करोड ५७ लाख ९५ हजार ४ सय ४९ रुपैयाँ उठाउन बाँकी थियो’, उनले ऊर्जाखबरसँग भने, ‘केन्द्रले प्रदेश नम्बर १ अन्तर्गत रहेका वितरण केन्द्रमध्ये सबैभन्दा बढी लाइन काटेर बक्यौता असुल गरेको हो ।’
उनका अनुसार लाइन काटिएकामध्ये २ हजार ९ सय ८८ जनाले १ करोड ३० लाख ४९ हजार ४ सय ५० रुपैयाँ बक्यौता बुझाएपछि लाइन पुन जोडिएको छ । केन्द्रले लाइन काट्ने–जोड्ने बापत चार्ज २१ लाख ७ हजार ४ सय संकलन गरेको पनि रिजालले बताए ।
गत केन्द्रले कालो सूचीमा रहेको ग्राहकबाट ४ लाख ९५ हजार ८ सय १८ रुपैयाँ उठाएको छ । यो अवधिमा विद्युत चोरी गरेका व्यक्तिलाई कारबाही गरी उनीहरुबाट २ लाख ५० हजार ४ सय ३२ रुपैयाँ असुल गरिएको केन्द्रले जनाएकाे छ ।
केन्द्रले महसुल तिर्न अटेर गर्ने ग्राहककाे लाइन काट्ने कामलाइ तिब्र गतिमा अघि बढाएकाे छ । वितरण केन्द्र अन्तर्गत ४७ हजार ७ सय २२ जना ग्राहक छन् । केन्द्र अन्तर्गत १९ प्रतिशत चुहावाट भइरहेको छ ।
.jpg){kind=spacer}