ऊर्जा खबर
काठमाडौं । सुपर खुदी हाइड्रो पावर कम्पनीमा रोजगारीको अवसर खुलेको छ । कम्पनीले लमजुङको खुदी खोलामा निर्माण सुरु हुन लागेको २६ मेगावाटको माथिल्लो खुदी खोला जलविद्युत आयोजनामा खटाउने गरी कर्मचारी माग गरेको हो ।
भूगर्भविद, सिभिल इन्जिनियर, सर्वेक्षक र प्रशासन अधिकृतको रिक्त पदपूर्ति गर्न आवेदन खुलाइएको कम्पनीले जनाएको छ । कम्पनीका अनुसार २ जना वरिष्ठ भूगर्भविद तथा ४ जना सिभिल इन्जिनियरका लागि आवेदन माग गरिएको छ ।
यस्तै, एक जना वरिष्ठ सर्वेक्षक, २ जना जुनियर सर्वेक्षक र एक जना प्रशासन अधिकृत माग गरिएको छ । इच्छुकले आगामी मंगलबार ( चैत १७ गते) सम्म आवेदन दिनु पर्नेछ ।
आवेदकले बायोडाटा, नेपाली नागरिकताको प्रतिलिपि, शैक्षिक योग्यताको प्रमाणपत्र प्रतिलिपि र पासपोर्ट साइजको फोटो सहित आवेदन बझाउनुपर्नेछ । आवेदकले कम्पनीको इमेल [email protected] मार्फत आवेदन दिन सक्नेछन् ।
कम्पनीले चालू आर्थिक वर्षभित्र आयोजनाको सिभिल संरचनाको निर्माण सुरु गर्दैछ । निर्माण सुरु गरेको ३ वर्षमा आयोजना सम्पन्न गरी विद्युत उत्पादन गर्ने लक्ष्य छ । नेपाल विद्युत प्राधिकरणले आयोजनाबाट २०८० माघदेखि विद्युत उत्पादन गर्ने तालिका दिएको छ ।
आयोजना सम्पन्न गर्न ४ अर्ब १९ करोड रुपैयाँ लागत अनुमान गरिएको छ । आयोजनामा बैंक अफ काठमाडौंको अगुवाईमा ग्लोबल आइएमइ, मेगा, सिभिल र एनसिसी बैंकले ३ अर्ब ३ करोड रुपैयाँ ऋण लगानी गरेका छन् ।
