ऊर्जा खबर
काठमाडौं । ४.९५ मेगावाटको माथिल्लो पिलुवा–३ जलविद्युत आयोजनामा लक्ष्मी र माछापुच्छ्रे बैंकले ऋण लगानी गर्ने भएका छन् । संखुवासभामा निर्माणाधीन आयोजनामा दुई बैंकले सहवित्तियकरण अन्तर्गत कर्जा लगानी गर्ने भएका हुन् ।
लक्ष्मी बैंकले ३९ करोड ९९ लाख रुपैयाँ र माछापुच्छ्रे बैंकले २५ करोड ६० लाख ( ६५ करोड ५९ लाख) रुपैयाँ लगानी गर्ने गरी सम्झौता भइसकेको कम्पनीले जनाएको छ । कम्पनीका अनुसार बैंकले गरेको लगानी कुल लागतको ७० प्रतिशत हो ।
बाँकी ३० प्रतिशत अर्थात २८ करोड ११ लाख रुपैयाँ स्वपुँजी लगानी छ । आयोजना सम्पन्न गर्न ९३ करोड ७० लाख रुपैयाँ लागत अनुमान गरिएको छ ।
आयोजनाको कम्पनी र नेपाल विद्युत प्राधिकरणबीच २०७५ चैत्र १२ गते नै विद्युत खरिद सम्झौता (पिपिए) भएको थियो । पिपिए अनुसार आयोजनाबाट उत्पादन भएको विद्युत प्राधिकरणले हिउँदमा प्रतिमेगावाट ८.४० रुपैयाँ र बर्खामा ४.८० रुपैयाँ खरिद गर्नेछ ।
यो आयोजना सम्पन्न भएपछि करिब २८.४१७ गिगावाट घण्टा विद्युत वार्षिक रुपमा उत्पादन हुनेछ । निर्माणाधीन आयोजना एकवर्षभित्र सम्पन्न गरी विद्युत उत्पादन सुरु गर्ने लक्ष्य रहेको छ । आयोजनाबाट २०७८ फागुनदेखि विद्युत उत्पादन गर्ने तालिका छ ।
