ऊर्जा खबर
काठमाडौँ । संयुक्त ऊर्जा लिमिटेडले चौथो वार्षिक साधारणसभा सम्पन्न गर्दै आफ्ना सेयरधनीलाई ७.५ प्रतिशत नगद लाभांश दिने निर्णय गरेको छ । आर्थिक वर्ष (आव) २०८२/८३ को आम्दानी तथा मुनाफाबाट उक्त लाभांश दिइने भएको हो ।
म्याग्दी जिल्लाको रघुगंगा गाउँपालिकामा २१.३ मेगावाटको ठूलोखोला जलविद्युत् आयोजना निर्माण गरी सञ्चालनमा ल्याएको कम्पनीले आगामी दिनमा साधारण सेयर (आइपिओ) निष्काशन गरी करिब ४७ मेगावाटको सानीभेरी निर्माणसमेत गरेको छ ।
ठूलो खोलाबाट २०८२ साल जेठ १ गतेदेखि व्यावसायिकरूपमा विद्युत् उत्पादन भइरहेको छ । यो नेपाली इन्जिनियरहरूको समूह र लगानीमा निर्माण भएको आयोजना हो । यसमा ठूलो संख्यामा गैरआवासीय नेपाली (एनआरएन) हरूको समेत लगानी रहेको छ ।
कम्पनीका अनुसार आव २०८२/८३ मा रु. १३ करोड ९६ लाख खुद मुनाफा (कर पछिको) आर्जन गरेको छ । साथै, कम्पनीको प्रतिसेयर आम्दानी रु. ११.७४ रहेको छ । समीक्षा वर्षमा कूल १०,०९,०४,४१७ युनिट विद्युत् उत्पादन गर्ने लक्ष्य राखिएकोमा ७,९२,०२,४३० युनिट (अर्थात् ७८.४९ प्रतिशत) विद्युत उत्पादन भएको जानकारी गराइएको छ ।
कम्पनीको जारी पुँजी रु. १ अर्ब ६० करोडको १० प्रतिशत अर्थात रु. १६ करोडको प्रतिसेयर रु. १०० अंकित दरका १६,००,००० कित्ता सेयर २१.३ मेगावाटको ठूलोखोला प्रभावित क्षेत्रका बासिन्दा (स्थानीय बासिन्दा) लाई र जारी पुँजीको १६ प्रतिशत अर्थात् रु. २५ करोड ६० लाखको प्रति सेयर रु. १०० अंकित दरका २५,६०,००० कित्ता सेयर सर्वसाधारणलाई गरी जम्मा ४१,६०,००० कित्ता सेयर प्राथमिक निष्कासन गर्ने योजना अगाडि बढाइएको छ ।
कम्पनीले सानी भेरी हाइड्रोपावर कम्पनी प्रालिद्वारा प्रवर्द्धित सानी भेरी – ३ (४६.७२ मेगावाट) मा प्रारम्भिक सार्वजनिक निष्कासन लगायतबाट प्राप्त हुने रकम लगानी गर्ने जनाइएको छ । हाल यस आयोजनाको प्रारम्भिक काम सुरु गरिएको छ ।
.jpg)