ऊर्जा खबर
काठमाडौं । ग्रीन लाइफ हाइड्रो पावर कम्पनीले माघ २३ गतेदेखि प्राथमिक सेयर निष्कासन गर्ने भएको छ । कम्पनीले दोलखामा निर्माणाधीन ४० मेगावाटको खानी खोला–१ जलविद्युत आयोजनाको सर्वसाधारणका लागि छुट्याएको सेयर निष्कासन गर्न लागेको हो ।
सर्वसाधारणका लागि ३४ करोड ९६ लाख ४० हजार रुपैयाँ बराबरको ३४ लाख ९६ हजार ४ सय कित्ता सेयर निष्कासन गर्न लागेको कम्पनीले जनाएको छ । कम्पनीका अनुसार निष्कासन हुने सेयरमध्ये १६ लाख ८६ हजार ४ सय कित्ता आयाेजना प्रभावित क्षेत्रका स्थानीयले नकिनेर बाँकी रहेकाे हाे । स्थानीयका लागि १८ लाख कित्ता सेयर निष्कासन गरिएको थियो ।
कम्पनीले स्थानीयका लागि सेयर निष्कासन गरेर बाँडफाँड गरेकाे २ वर्षपछि साधारण सेयर निष्कासन गर्न लागेकाे हाे । साधारण सेयरमध्ये १ लाख ७४ हजार ८ सय २० कित्ता सेयर सामूहिक लगानी कोष र ६९ हजार ९ सय २८ कित्ता कम्पनीमा कार्यरत कर्मचारीका लागि सुरक्षित गरिएको छ । बाँकी ३२ लाख ५१ हजार ६ सय ५२ कित्ताका लागि सर्वसाधारणले आवेदन दिन सक्ने कम्पनीले जनाएको छ ।
सर्वसाधारणले छिटोमा माघ २७ र ढिलोमा फागुन ७ गतेसम्म आवेदन दिन सक्नेछन् । आवेदकले न्यूनतम १० कित्तादेखि अधिकतम १ लाख कित्तासम्म आवेदन दिन सक्नेछन् । कम्पनीले सेयर निष्कासन गरी बाँडफाँड गर्न बिओके क्यापिटल लिमिटेडलाई बिक्री प्रबन्धक तोकेको छ ।
कम्पनीले दोलखामा निर्माण गरिरहेकाे ४० मेगावाटको खानी खोेला–१ अन्तिम चरणमा पुगेको छ । याे आयोजना चालू आर्थिक वर्षभित्र प्रसारण प्रणालीमा जाेडिँदैछ । आयाेजनाले उत्पादन गर्ने विद्युत सिंगटी सबस्टेसनमा जाेडिनेछ ।
