ऊर्जा खबर
काठमाडौं । नेपाल विद्युत प्राधिकरण इलाम वितरण केन्द्रले करिब ५२ लाख ३५ हजार रुपैयाँ विद्युत महशुल बक्यौता असुली गरेको छ । केन्द्रले लामो समयसम्म विद्युत महशुल नबुझाउने ग्राहकको लाइन काटी बक्यौता असुली गरेको हो ।
बारम्बार ताकेता गर्दा पनि महशुल नबुझाउने ग्राहकको लाइन काटी विद्युत महशुल बक्यौता असुल गरेको केन्द्र प्रमुख देगराज पौडेलले बताए । उनका अनुसार साउनदेखि मंसिरसम्मको अवधिमा १ हजार २ सय ५० ग्राहकको लाइन काटिएको छ । यी ग्राहकबाट ८० लाख ४८ हजार ७ सय १० रुपैयाँ महशुल उठाउन बाँकी थियो ।
लाइन काटिएका ग्राहकमध्ये ८ सय ४३ जनाले जरिवाना सहितको ५२ लाख ३५ हजार ३ सय ४३ रुपैयाँ बुझाएपछि लाइन पुनःजोडिएको पौडेलले बताए । बाँकी ४ सय ७ जनाले पनि जरिवाना सहितको विद्युत महशुल बक्यौता बुझाएपछि लाइन जोडिनेछ ।
केन्द्रले सबैभन्दा बढी मंसिरमा ८८६ ग्राहकको लाइन काटेको थियो । यी ग्राहकबाट ४८ लाख ६० हजार ९ सय ८८ रुपैयाँ उठाउन बाँकी थियो । लाइन काटिएका मध्ये ६ सय ५८ जनाले ३१ लाख ३७ हजार ७ सय ७१ रुपैयाँ बुझाएपछि लाइन जोडिएको छ ।
यस्तै, साउनमा २ ग्राहकबाट ३३ हजार ६ सय ६० रुपैयाँ असुल गरेको छ । भदौमा १ लाख ९४ हजार ३९ रुपैयाँ, असोजमा १० लाख ९५ हजार ७ सय ३३ रुपैयाँ, कात्तिकमा ७ लाख ७४ हनजार १ सय ३८ रुपैयाँ विद्युत महशुल बक्यौता उठाएको छ ।
यो अवधिमा केन्द्रले कालोसूचीमा रहेका ग्राहकबाट १ लाख २२ हजार १ सय २४ रुपैयाँ असुल गरेको छ । केन्द्रले विद्युत महशुल संकलनलाई तिव्र गतिमा अघि बढाएको छ । केन्द्रबाट अहिले ४८ हजार ग्राहकले सेवा लिइरहेका छन् ।
