ऊर्जा खबर
काठमाडौं । पाँचखालमा स्मार्ट सिटी निर्माण गर्ने सम्बन्धमा नेपाल इन्फ्रास्ट्रक्चर बैंक (निफ्रा) लिमिटेड र सिंगापुरस्थित सुरबाना जुरोङ समूहको सदस्य एसएमईसी इन्टरनेशनल प्रालि (स्मेक) बीच समझदारी भएको छ । समझदारीपत्र (एमओयू) मा निफ्राका प्रमुख कार्यकारी अधिकृत रामकृष्ण खतिवडा र स्मेकका कन्ट्री हेड सलिम जहाँ फहिमले हस्ताक्षर गरेका छन् ।
एमओयू अनुसार सिंगापुरको ग्लोबल सहरी पूर्वाधार परामर्श फर्म सुरबाना जुरोङ समूहको एसएमईसीले प्रस्तावित स्मार्ट सिटीको निर्माण गर्न आवश्यक प्रारम्भिक अध्ययन, परियोजनाको संरचनागत खाका र अन्तराष्ट्रिय सफल अभ्यासहरू अध्ययन विश्लेषण सम्बन्धी काममा सहकार्य गर्नेछ ।
उक्त कम्पनीलाई आवश्यक सहजीकरण गर्दै निफ्राले परियोजनाका लागि आफ्नो अगुवाईमा लगानी जुटाउने जनाइएको छ । ५५०० रोपनी क्षेत्रफलमा निर्माण हुने स्मार्ट सिटीका लागि जग्गा उपलब्ध गराउन पाँचखाल नगरपालिकाले आवश्यक सहजीकरण र सहकार्य गर्ने पनि एमओयूमा उल्लेख छ । यस्तै, निफ्राले नगरपालिकासँग अलग्गै समझदारी गर्ने पनि जनाइएको छ ।
स्मार्ट सिटीको बजार अध्ययन (मार्केट स्टडी) गर्न निफ्राले अमेरिकास्थित परामर्शदाता कम्पनी जोन्स लाङ लासेल प्रोपर्टी कन्सल्ट्यान्टस् प्रलिसँग सम्झौता गरिसकेको छ । कम्पनीले अबको ८ महिनाभित्र अध्ययन गरी प्रतिवेदन पेश गर्नुपर्ने उल्लेख छ ।
एमओयू हस्ताक्षर कार्यक्रममा निफ्राका उच्च पदाधिकारी, परामर्शदाताका अधिकारी एवं पाँचखाल नगरपालिकाका पूवक्ता सञ्जय लामाको उपस्थिति थियो ।
