ऊर्जा खबर
काठमाडौं । लमजुङस्थित मिदिम खोलामा निर्माणाधीन ७.५ मेगावाटको माथिल्लो मिदिम खोला जलविद्युत आयोजनाको काम ४० प्रतिशत पूरा भएको छ । अबको ५ महिनामा विद्युत उत्पादन सुरु गर्ने गरी भुजुङ हाइड्रो पावर कम्पनीले निर्माण गरिरहेको आयोजनाको यति काम सकिएको हो ।
अहिले आयोजनाको बाँध, विद्युतगृह र पाइप लाइनको काम एकसाथ अघि बढेको कम्पनीका वित्तीय व्यवस्थापक दिनेशराज पन्तले बताए । उनका अनुसार बाँध क्षेत्रको अन्तिम चरणको काम भइरहेको छ ।
आयोजनाका लागि ३ हजार ७ सय ३५ मिटर लामो पाइपलाइन निर्माण हुनेछ । ‘पाइप जडान गर्ने काम भइरहेको छ,’ उनले ऊर्जा खबरसँग भने, ‘विद्युतगृहको पनि सिभिल संरचनाको काम सकिएको छ ।’
अहिले आयोजनाको काम तिव्र गतिमा अघि बढाउन नसकिएको पनि पन्तले बताए । ‘आयोजनास्थल जाने सडक बाढीले बगाउँदा भन्सारमा रहेको उपकरण पुर्याउन सकिएको छैन, स्थानीयले सडक बनाउने काम गरिरहेकोले तिहारपछि मात्र कामले तिव्रता लिनेछ’ उनले भने ।
नेपाल विद्युत् प्राधिकरणले आयोजनाका लागि २०७८ साउनमा विद्युत् उत्पादन सुरु गर्ने तालिका तोकेको थियो । तर, कोरोना (कोभिड–१९) महामारीका कारण निर्माण प्रभावित हुँदा विद्युत् उत्पादन अवधि पनि १ वर्ष धकेलिएको थियो ।
पछिल्लो तालिका अनुसार आयोजनाको सबै काम पूरा गरी २०७९ साउनभित्र विद्युत उत्पादन सुरु गर्ने योजना थियो तर, सोचेअनुरुप काम नभएपछि तालिका फेरी प्रभावित भएको छ । अबकाे नयाँ तालिका अनुसार आगामी फागुनभित्र उत्पादन सुरू गर्ने लक्ष्य छ ।
आयोजना सम्पन्न भइ सञ्चालनमा आएपछि उत्पादित विद्युत् २५ किलोमिटर टाढा रहेको प्राधिकरणको भोर्लेटार सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनीले नै निर्माण गरिरहेको छ ।
कम्पनीले आयोजना निर्माण गर्न २०७६ भदौ २६ गते विद्युत् विकास विभागबाट उत्पादन अनुमतिपत्र लिएको थियो । १ अर्ब ४४ करोड रुपैयाँ लागत अनुमान गरिएको आयोजनामा कुमारी बैंकको अगुवाई सांग्रिला डेभलपमेन्ट बैंकले ७५ प्रतिशत ऋण लगानी गरेका छन् । बाँकी २५ प्रतिशत स्वँपुजी लगानी छ ।
