ऊर्जा खबर
काठमाडौं । संखुवासभामा निर्माण सम्पन्न माया खोला जलविद्युत आयोजनाको १४.९ मेगावाट विद्युत पुसभित्र राष्ट्रिय प्रसारण प्रणालीमा जोडिने भएको छ । मायाखोला हाइड्रो पावर कम्पनीले निर्माण सम्पन्न गरी उपकरणहरूको समेत परीक्षण (ड्राइ टेष्ट) पूरा गरेको आयोजनाको विद्युत प्रणालीमा थपिन लागेको हो ।
सिभिल निर्माण, उपकरण जडान तथा आन्तरिक परीक्षण पूरा भएको आयोजनाको १४.९ मेगावाट विद्युत पुसभित्र प्रसारण प्रणालीमा जोड्ने तयारी भइरहेको कम्पनीका अध्यक्ष बिजयमान शेरचनले बताए । उनका अनुसार अहिले अन्तिम चरणकाे काम भइरहेकाे छ ।
आयोजनाबाट विद्युत उत्पादन सुरु गर्नुअघि जडान भएका हाइड्रो तथा इलेक्ट्रो मेकानिकल उपकरण ठिक छ की छैन् भनेर परीक्षण गर्ने काम सकिएको कम्पनीले जनाएको छ ।
आयोजनाको निर्माण सम्पन्न गरी २०७८ असारदेखि विद्युत उत्पादन गर्ने तालिका थियो । तर, कोरोना महामारी र दोस्रो लहरमा ४० जना बढी कामदार तथा कर्मचारी संक्रमित भएपछि निर्माण प्रभावित हुँदा विद्युत उत्पादन हुने तालिका सरेको हो ।
आयोजना सम्पन्न भई उत्पादन हुने विद्युत कोसी कोरिडोरको तुम्लिङटार–इनरुवा खण्डको बानेश्वर सबस्टेसनमा जोडिनेछ । आयोजनाको विद्युतगृहबाट सबस्टेसनसम्म आवश्यक ३ किलोमिटर प्रसारण लाइन कम्पनी आफैले निर्माण गरेको हो ।
यो आयोजना सम्पन्न गर्न २ अर्ब ५० करोड रुपैयाँ लागत अनुमान गरिएको छ । माया खोला ‘सुपर सिक्स’ अन्तर्गत प्रतिस्पर्धा गराएर निजी क्षेत्रलाई निर्माण गर्न दिइएको आयोजना हो ।
