ऊर्जा खबर
काठमाडौं । दुई जलविद्युत आयोजना निर्माण सम्पन्न गरी सञ्चालनमा ल्याएको अरुण भ्याली हाइड्रो पावर डेभलपमेन्ट कम्पनी लिमिटेडले प्रदेश नम्बर १ को ताप्लेजुङ जिल्लामा १५ मेगावाटको माथिल्लो काबेली-२ जलविद्युत आयोजना निर्माण गर्ने भएको छ ।
कम्पनीले आयोजना अघि बढाउन उत्पादन अनुमतिका लागि विद्युत विकास विभागमा आवेदन दिएको छ । आयोजनाको अध्ययन पूरा भएकोले उत्पादन अनुमतिपत्र लिने प्रक्रिया अन्तिम चरणमा पुगेको कम्पनीले जनाएको छ । विभागले कम्पनीको नाममा उत्पादन अनुमतिपत्र जारी गर्न ३५ दिने सूचना जारी गरेको छ ।
विभागले अनुमतिपत्र जारी गर्नुअघि सूचना प्रकाशन गरेर आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवाला समक्ष आग्रह गरेको छ ।
यो आयोजनाको मूख्य संरचना काबेली खोलाको दायाँ किनारमा पर्दछ । खोलामा बाँध बाँधी ३१५१ मिटर लामो हेडरेस पाइप तथा ४३० मिटर लामो पेनस्टक पाइपमार्फत पानीलाई विद्युतगृहमा पुर्याइनेछ ।
विद्युतगृहमा २ वटा टवाईन जडान हुनेछ । टर्वाइनमा रहेको जेनेरेटरमार्फत विद्युत उत्पादन गरिनेछ । आयोजनाबाट वार्षिक ८७.४ गिगावाट घन्टा विद्युत उत्पादन हुनेछ । आयोजनाको काम २०८२ भदौभित्र सम्पन्न गर्ने कम्पनीको योजना छ ।
आयोजनाबाट उत्पादन भएको विद्युत १३२ केभी प्रसारण लाइन मार्फत १० किलोमिटर दुरीमा रहेको नेपाल विद्युत प्राधिकरणको अमरपुर सबस्टेसनमा जोडिनेछ । सबस्टेसनसम्मको आवश्यक लाइन कम्पनी आफैले निर्माण गर्नेछ ।
यो कम्पनीले ३ मेगावाटको पिलुवा खोला, ९.८४ मेगावाटको काबेली बी-१ क्यासकेड निर्माण गरी सञ्चालनमा ल्याएको छ ।
.jpg)
